İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 169 Hüküm no: 155 Orijinal metin no: [21a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sultan Abdülhamid Han vakfından icareli, üç bab kasap dükkânı gediğinin altıda bir hissesine mutasarrıf olan Ayşe bt. Ebûbekir’in vefâtı üzerine, gedik hissesinin evlatlarına intikal ettiği Kassâb Ma‘rûz Hüdâvendigâr-ı sâbık merhûm ve mağfûrun leh Sultan Abdülhamid Hân hazretleri evkāfı musakkafâtından Sultan Bâyezid-i Veli Câmi‘-i şerîfi kurbünde Okçularbaşında manav dükkânına muttasıl bir bâb ve Vezir Hânı karşısında bir bâb ve Vâlidehânı karşısında bir bâb cem‘an üç bâb kasab dükkânları derûnlarında mevcûde beyne’l-hıref gedik tâ‘bir olunan âlât-ı lâzıme-i ma‘lûmeden altı sehm i‘tibârıyla bir sehmine bâ-temessük-ı vakıf mutasarrıfe olan Âişe bt. Ebûbekir fevt olup hisse-i mezkûresi sadriye evlâdları es-Seyyid Mehmed Râşid ve es-Seyyid Mehmed Reşid ve Şerîfe Emine’ye ba‘de’l-intikāl merkūm es-Seyyid Mehmed Râşid bilâ-veled fevt olmağla dekâkîn-i mezkûre gedikleri on sekiz sehm i‘tibârıyla mutasarrıf olduğu birer sehmi mahlûl ve taraf-ı vakfa âid olmağla vakf-ı müşârun-ileyh kāimmakām-ı mütevellîsi kethüdâ-yı mehd-i ulyâ Atûfetlü Yusuf Ağa hazretleri tarafından vekîli câbi-i vakıf Halil Efendi b. Ahmed zikr olunan birer sehm hisselerini beyne’l-esnâf müzâyede ve gıbbe inkıtâ‘ı’r-rağbe babası es-Seyyid el-Hâc Mehmed üzerinde yüz yirmi beş guruşda karar-dâde olmağla müteveffâ-i mezbûrun zikr olunan hisseleri mu‘accele-i mezkûre-i makbûza ve müeccele-i kadîme-i ma‘lûmesiyle babası merkūm es-Seyyid el-Hâc Mehmed’e taraf-ı vakıfdan îcâr olunduğu ilmühaberini vermekle defter-i vakfa babası merkūm es-Seyyid el-Hâc Mehmed üzerine kayd ve cânib-i vakıfdan yedine temessük i‘tâsını istid‘â eylediği İslâmbol Mahkemesi’nden huzûr-ı âlîlerine i‘lâm olundu. Fî-11 min-Zilka‘de sene [1]216