İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 170 Hüküm no: 156 Orijinal metin no: [21a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Hasan’ın, İzmir tüccarlarından Seyyid Mustafa, Hâfız Mehmed ve Hüseyin’e borcunu ödemesi gerektiği İkrâr-ı deyn Ma‘rûz İzmir tüccârından yedi yüz kırk yedi guruş iddi‘â eden es-Seyyid el-Hâc Mustafa b. İbrahim ve yüz on bir buçuk guruş iddi‘â eden diğer el-Hâc Mustafa b. Osman ve iki yüz kırk beş buçuk guruş iddi‘â eden Hâfız Mehmed b. Hasan ve iki bin seksen iki guruş on yedi para iddi‘â eden Hüseyin b. Mustafa nâm kimesneler meclis-i şer‘-i münîrde İslâmbol’da Zindânkapısı kurbünde Sabuncu es-Seyyid Hasan nâm kimesne mahzarında merkūm es-Seyyid Hasan zimmetinde bundan akdem yedimizden ve malımızdan iştirâ ve kabz eylediği vezn ve kıyyesi beynimizde ma‘lûm İzmir sabunu semeninden bâlâda muharrer ol mikdâr guruş alacağımız olmağla hâlâ taleb ederiz deyü her biri ba‘de’d-da‘vâ ve’l-istintak merkūm es-Seyyid Hasan cevâbında mezbûr es-Seyyid el-Hâc Mustafa’ya cihet-i mezkûreden yedi yüz kırk yedi guruş ve merkūm diğer el-Hâc Mustafa’ya yüz on bir buçuk guruş ve Hâfız Mehmed’e iki yüz kırk beş buçuk guruş ve merkūm Hüseyin’e iki bin seksen iki guruş on yedi para zimmetinde deyni olduğunu ikrâr u i‘tirâf etmeğin mûcebince mebâliğ-i mezkûreyi müdde‘ûn-ı mezbûrûna edâsıyla merkūm es-Seyyid Hasan ilzâm olunduğu İslâmbol Mahkemesi’nden huzûr-ı âlîlerine i‘lâm olundu. Fî-19 min Za sene [1]216