İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 171 Hüküm no: 158 Orijinal metin no: [21b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şerife Saîde bt. İbrahim’in, Cerrahpaşa Vakfı hamamını Mehmed b. Mustafa’ya kiraladığı ve sulh oldukları Cerrahpaşa hamamı nizâ‘ından sulh ve îcâr Ma‘rûz Sâhibe-i arzuhâl mu‘arrefetü’z-zât Şerîfe Saîde bt. el-Hâc İbrahim nâm Hatun nezâret-i hazret-i Şeyhülislâmî’de âsûde evkāf müfettişi mevâlî-i izâmdan Faziletlü Mehmed Su‘ada Bey Efendi ma‘iyyetiyle du‘âhânemizde ma‘kūd meclis-i şer‘-i münîrde zikri âtî vakıf hammâmda müştereki arzuhâlde mezkûr hammâmı Mehmed b. el-Hâc Mustafa mahzarında nezâret-i Hazret-i müşârun-ileyhde olan İslâmbol’da Cerrahpaşa Vakfı musakkafâtından vâkıf-ı mûmâ-ileyhe intimâ ile ma‘rûf Çifte Hamâm ve hâricinde vâki‘ bir bâb dükkân ve dellâk odaları ve mahtab mahallî üç hisse i‘tibâriyle bir hissesine ben ve iki hissesine mezbûr Mehmed îcâreteyn ile bâ-temessük-ı mütevellî mutasarrıf olmamızla ben hissemi bin iki yüz dokuz senesi Şevvâlinde beher şehr on sekiz guruşa müşterikim mezbûra îcâr ve teslîm ve işbu târih-i i‘lâm-ı şehri gurresine gelince dokuz sene müddetde îcâreden müctemi‘a olan bin dokuz yüz kırk dört guruşu mezbûr Mehmed’den hâlâ taleb ederim deyü tasaddî eylediğim da‘vâmdan bâ-tavassut-ı muslihîn mezbûr Mehmed ile kat‘an li’n-nizâ‘ iki yüz yirmi beş guruşa sulh olduğumda ol dahi sulh-i mezkûru ba‘de’l-kabûl bedel-i sulhten mâ‘adâsına müte‘allika âmme-i da‘vâdan ben mezbûr Mehmed’in zimmetini ol dahi işbu târihe gelince hamâm-ı mezkûrun ta‘mîr ve termîmine masrûfuna müte‘allika âmme-i da‘vâdan benim zimmetimi ibrâ ve iskāt ve her birimiz ber-vech-i muharrer âharın ibrâsını kabûl eylediğimden sonra hamâm-ı mezkûrun külhânı ta‘mîre muhtâc olmağla kendi malından teberru‘an li’l-vakf mezbûr Mehmed binâya ve bundan sonra iktizâ eden mahallerini hissemize göre ta‘mîr ve termîme müte‘ahhid olduk deyü takrîrini mezbûr Mehmed tasdîk eylediğinden sonra bedel-i sulh-ı mezkûr iki yüz yirmi beş guruşu müdde‘iye-i mezbûreye edâ ve teslîme mezbûr Mehmed’e ba‘de’t-tenbîh mezbûre Şerîfe Saîde Hatun hamâm ve dükkân ve oda ve mahtab mahallinde olan hisse-i mezkûresini târih-i i‘lâmdan beher şehr onar guruşa müşteriki mezbûr Mehmed’e îcâr ol dahi istîcâr ve kabûl eylediği İslâmbol Mahkemesi’nden huzûr-ı âlîlerine i‘lâm olundu. Fî-15 min-Zilka‘deti’ş-şerîfe sene [1]216