İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 172 Hüküm no: 160 Orijinal metin no: [21b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Agob v. Alaksan ile Yani v. Tanaş’ın alacak davası hususunda bir birlerinin zimmetlerini ibra edip anlaştıkları Meccânen ibrâ Ma‘rûz Arzuhâl eden Tütüncü Agob v. Aleksan zimmî meclis-i şer‘-i münîrde arzuhâlde mastûr tütün tüccârından Yani v. Tanaş zimmî muvâcehesinde işbu târih-i i‘lâm senesi Cumâdelâhiresinin dördüncü günü İslâmbol’da Demirkapı kurbünde dükkânımda mesfûr Yani zimmîye iki yüz doksan altı guruş ikrâz ve teslîm ol dahi iktirâz ve kabz edip meblağ-ı mezkûr hâlâ zimmetinde olmağla taleb ederim deyü ba‘de’d-da‘vâ ve’l-istintak ve’l-inkâr müdde‘î-i mersûm ber-vech-i muharrer müdde‘âsını isbâtdan ızhâr-ı acz ve istihlâf etmekle mesfûr Yani zimmîye bi’l-muvâcehe ber-nehc-i şer‘î yemîn verildikten sonra müdde‘î-i mersûm Agob zimmî da‘vâ-yı mezkûresinden meccânen fâriğ olup husûs-ı mezkûra ve işbu târih-i i‘lâma gelince sâir beynlerinde cereyân eden ahz u i‘tâya müte‘allika âmme-i de‘âvi ve kâffe-i mütâlebâtdan mesfûr Yani zimmînin zimmetini ibrâ-yı âmm ile ibrâ ve iskāt eylediğinde ol dahi mersûm Agob zimmî zimmetinde bâ-temessük alacağı olan ve dört yüz doksan iki guruşdan mâ‘adâ sâir beynlerinde cereyân eden ahz u i‘tâya müte‘allika âmme-i de‘âvî ve kâffe-i mütâlebâtdan mersûm Agob zimmînin zimmetini ibrâ ve iskāt edip ve her biri ber-vech-i muharrer âharın ibrâsını kabûl ile kat‘-ı münâza‘a eyledikleri İslâmbol Mahkemesi’nden huzûr-ı âlîlerine i‘lâm olundu. Fî-21 min-Zilka‘de sene [1]216