İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 173 Hüküm no: 161 Orijinal metin no: [21b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sova v. Beyram’ın, Seyyid İbrahim Çelebi b. Ahmed’e olan borcunu kefilleri Küfeci Sova ve Bakkal Esterati’nin ödemesi gerektiği 500 guruş hüküm Ma‘rûz Üsküdârî es-Seyyid el-Hâc İbrahim Çelebi b. Ahmed meclis-i şer‘-i münîrde Küfeci Sava v. Bahadır ve Bakkāl Esterati v. Toma nâm zimmîler muvâcehelerinde gāib ani’l-meclis bakkāl diğer Sava v. Bayram nâm zimmî zimmetinde semen-i mebî‘ ve gedik îcâresinden alacağım olan bin beş yüz guruşa işbu mersûmân Sava ve Esterati ile gāib ani’l-meclis Braşkova zimmîler ma‘an kefîl ve dâmin olmalarıyla meblağ-ı mezkûrun iki yüz guruşunu asîl-i mersûm bana edâ ve dört yüz guruşdan küfelâyı ba‘de’l-ibrâ bâkī dokuz yüz guruşdan mersûmân Sava ve Esterati zimmîler kendi hislerine isâbet eden altı yüz guruşun yüz guruşunu bana edâ etmeleriyle bâkīsi olan beş yüz guruşu dahi kefâletlerine binâen mersûmândan hâlâ taleb ederim deyü da‘vâ ettikde onlar dahi cevâblarında müdde‘î-i merkūmun ber-vech-i muharrer müdde‘âsını bi-tamâmihî ikrâr u i‘tirâf etmeleriyle mûcebince meblağ-ı bâkī-i mezkûr beş yüz guruşdan her birinin hissesine iktizâ eden ikişer yüz ellişer guruşu müdde‘î-i merkūm es-Seyyid el-Hâc İbrahim Çelebi’ye edâ ve teslîme mersûmân Sava ve Esterati zimmîlere tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-19 min-Zilka‘de sene [1]216