İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 173 Hüküm no: 162 Orijinal metin no: [22a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarefem v. Antamos’un alacaklı olduğu bakkal Vasil v. Luta ile sulh oldukları 80 guruşa sulh ibrâ Ma‘rûz Bakkāl Sarafim v. Antamos zimmî meclis-i şer‘-i münîrde bakkāl Vasil v. Luta zimmî muvâcehesinde mersûm Vasil zimmîden bundan akdem yedi yüz elli guruşa iştirâ ve kabz ve ba‘dehû fesh ve ikāle eylediğimiz İslâmbol’da Tahtakale kurbünde vâki‘ bir bâb bakkāl dükkânı derûnunda mevcûde beyne’l-hıref gedik tâ‘bir olunur âlât-ı lâzımenin yüz yirmi sehm i‘tibâriyle altmış sehmi semeninden zimmetinde yüz elli guruş alacağım olmağla taleb ederim deyü tasaddî eylediğim da‘vâmdan bâ-tavassut-ı muslihîn mersûm Vasil zimmî ile kat‘an li’n-nizâ‘ seksen guruş bedel-i makbûza sulh olduğumda ol dahi sulh-ı mezkûru ba‘de’l-kabûl ziyâde müdde‘âma ve bi’l-cümle sâir hukūk-ı şer‘iyyeye müte‘allika da‘vâdan her birimiz âharın zimmetini kabûlü hâvi ibrâ-yı âm ile ibrâ ve iskāt eyledik deyü ikrâr ve tasdîkleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-21 min-Zilka‘de sene [1]216