İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 174 Hüküm no: 163 Orijinal metin no: [22a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yani v. Tanaş’ın, Tütüncü Agob v. Aleksan’daki alacağını taksitlendirdiği Taksît Ma‘rûz Duhân tüccârından Yani v. Tanaş zimmî meclis-i şer‘-i münîrde İslâmbol’da Demirkapı kurbünde Tütüncü Agob v. Aleksan zimmî muvâcehesinde mersûm Agob zimmî zimmetinde bundan akdem yedimden ve malımdan iştirâ ve kabz eylediği vezn ve kıyyesi beynimizde ma‘lûm duhân semeninden bâkī dört yüz doksan iki guruş bâ-temessük alacağım olmağla meblağ-ı mezkûru hâlâ taleb ederim deyü da‘vâ eylediğimde ol dahi cevâbında ber-vech-i muharrer müdde‘âmı ikrâr lâkin deyn-i mezkûrumu hâlâ ve def‘aten edâya iktidârım yokdur deyü ber-vech-i âtî te’cîl ve taksîte tâlib olduğunda ben dahi meblağ-ı mezkûru beher şehr bana ellişer guruş vermekle târih-i i‘lâmdan dokuz ay yirmi dört gün hitâmında tamamen bana edâ ve teslîm etmek üzere te’cîl ve taksît eylediğimde ol dahi kabûl ve meblağ-ı mezkûr dört yüz doksan iki guruşu ber-vech-i muharrer müeccelen ve muksıtan bana edâya ta‘ahhüd eyledi deyü takrîrini mersûm Agob zimmî tasdîk eylediği İslâmbol Mahkemesi’nden huzûr-ı âlîlerine i‘lâm olundu. Fî-21 min-Zilka‘de sene [1]216