İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 174 Hüküm no: 164 Orijinal metin no: [22a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nikola v. Dimitri’nin, Sultan Abdülhamid Han vakfından kiraladığı kasap dükkânının yarım hissesini Yani v. Hirito’ya devrettiği Kassâb Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretleri evkāfı musakkafâtından mahrûse-i Galata’ya muzâfe Mirgün nâm mahalde vâki‘ bir bâb kasab dükkânını teberru‘an li’l-vakf binâ ve derûnunda mevcûde beyne’l-hıref gedik tâ‘bir olunur âlât-ı lâzıme-i ma‘lûmelere bâ-temessük-ı mütevellî mutasarrıf olan Nikola v. Dimitri meclis-i şer‘-i münîrde hâssa kasabbaşısı Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî kimesneler hâzır oldukları hâlde kasab ustalığını idareye kādir idüğü ihbâr olunan Yani v. Hristo nâm zimmî muvâcehesinde takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûmelerimin nısfını yedimde ibkā ve nısf-ı âharını kendi hüsn-i rızâ ve tayyib-i ihtiyârımla bedel-i ma‘lûm ve makbûz mukābelesinde mersûm Yani zimmî[ye] bâ-re’y-i mütevellî ferağ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm gedik tâ‘bir olunan âlât-ı lâzımelerin nısfında benim alâka ve medhalim kalmayıp mersûm Yani zimmînin hakk-ı müfevvezi olmuşdur dedikde mersûm Yani zimmî dahi ba‘de’t-tasdîk zikr olunan âlât-ı lâzıme-i ma‘lûmeler kendi üzerine defter-i vakfa kaydolunup yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-11 min-Zilka‘de sene [1]216