İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 175 Hüküm no: 165 Orijinal metin no: [22a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Sâdık’ın, Abdi Paşa b. Ali Paşa’nın neslinden olduğu iddiasıyla açtığı veraset davasını ispat edemediği Yedine tuğralı emir verilmeğe Ma‘rûz Vüzerâ-yı izâmdan müteveffâ Abdi Paşa b. Ali Paşa’nın li-ebeveyn er karındaşı Süleyman Bey’in oğlu Mehmed Bey’in oğlu olduğunu iddi‘â eden sâhib-i arzuhâl Mehmed Sâdık Çarşamba günü Arz odasında kāimmakām-ı âli-makām-ı merhûm Abdullah Paşa huzûrunda Haremeyni’ş-şerîfeyn müfettişi müderrisîn-i kirâmdan Mehmed Atâullah Efendi hâzır olduğu hâlde akd olunan meclis-i şer‘-i münîrde Rumeli’de Vodina kazâsı ahâlîsinden Ali Koç Bey b. Hasan’ın oğlu Ahmed Bey mahzarında ammim müteveffâ-i müşârun-ileyh hayatında def‘a-i ûlâ Rumeli Beylerbeyliği evânında Vodina kasabasında câmi‘-i şerîf binâ ve akârât iştirâ ve vakıf etmek için malından yetmiş bin guruş mezbûr Ahmed Bey ile ceddi Ali Koç Bey’e teslîm ve ber-vech-i muharrer harc u sarfa emir etmekle merkūmân dahi câmi‘-i şerîfin binâsına şürû‘ ve kable’l-itmâm ammim merkūm fevt olmağın meblağ-ı mezkûr yetmiş bin guruşdan yedlerinde kalan meblağ benimle zevcesi olup hâlâ Üsküdar’da sâkine Hatice Hanım’a mevrûs oldukdan sonra câmi‘-i mezkûra masrûflarını bundan akdem ben keşf ve tahmîn ettirdiğimde masrûfları on beş bin guruşa bâliğ olmağla makbûzları olan meblağ-ı mezkûr yetmiş bin guruşdan masrafları olan meblağ-ı mezkûr fürû-nihâde olundukda bâkīsi olan elli beş bin guruşun sekiz bin guruşu mezbûr Ali Koç Bey idânesiyle kazâ-i mezbûr re‘âyâları üzerlerinde ve bâkī kırk yedi bin guruşu mezbûr Ali Koç Bey ile merkūm Ahmed Bey yedlerinde kalıp ve re‘ayâ-yı mesfûrûn zimmetlerinde olan sekiz bin guruşu vasiyeti üzere ben vakf ve tescîl ettirip tevliyetini kendi nefsime vefâtımdan sonra evlâd-ı evlâdıma şart etmişken mezbûr Ahmed Bey tevliyeti bir-takrîb üzerimden ref‘ ve kendi üzerine tevcîh ettirip re‘âyâ-yı mesfûrûn zimmetlerinde olan sekiz bin guruşu dahi kabz etmekle makbuzu olan meblağ-ı mezkûr ile mukaddemâ yedlerinde kalan kırk yedi bin guruş ki cem‘an elli beş bin guruşdan hisse-i irsiyemi mezbûr Ahmed Bey’den taleb ederim deyü da‘vâ ettikde mezbûr Ahmed Bey cevâbında meblağ-ı mezkûr ber-vech-i muharrer vakfiyet üzere yedinde olduğunu ikrâr ve müdde‘î-i mezbûr Mehmed Sâdık’ın ber-vech-i muharrer verâset-i müdde‘âsını inkâr etmekle müdde‘î-i mezbûr ber-vech-i muharrer evvelâ verâset müdde‘âsını tashîh ve beyân-birle isbâta havâle olundukda lede’l-istimhâl ve’l-imhâl ityân-ı beyyine edemeyip kendüyü ihfâ ve bundan sonra mezbûr Ahmed Bey beldesine râhi oldukda vâlilere hitâben mübâşirli emr-i âlî ısdârıyla mezbûr Ahmed Bey’i ta‘cîz ve ızrâr kasdında olduğu zâhir ve ol bâbda mezbûr Ahmed Bey istirhâm eylediğine binâen fîmâ ba‘d merkūm Mehmed Sâdık’ın da‘vâ-yı mezkûresi arz odasında istimâ‘ olunup âhar mahallerde istimâ olunmamak üzere mukaddemâ ısdâr ettirdiği emrin bâlâsına şerh ve mezbûr Ahmed Bey’in yedine tuğra-yı garrâ ile mu‘anven emr-i âlîşân inâyet ve ihsân buyrulmak emr-i savâb idüğü İslâmbol Mahkemesi’nden huzûr-ı âlîlerine i‘lâm olundu. Fî-21 min-Zilka‘de sene [1]216