İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 176 Hüküm no: 166 Orijinal metin no: [22b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yusuf Ağa b. Ahmed’in, eşi Şerife Fâtıma Hatun ile muhâla‘a yoluyla boşandığı Muhâla‘a Ma‘rûz İslâmbol’da Tavâşî Süleyman Ağa Mahallesi’nde sâkine arzuhâlde isimleri mezkûre Şerîfe Fâtıma bt. el-Hâc Mehmed Sâdık Efendi b. İbrahim ile vâlidesi Şerîfe Emine bt. es-Seyyid Mustafa nâm hatunlar taraflarından husûs-ı âti’l-beyânda vekîl olduğu zâtlarını ârifân el-Hâc Mehmed Sâdık Ağa b. el-Hâc Ali ve Mustafa b. Ahmed şehâdetleriyle sâbit olan merkūme Şerîfe Fâtıma Hatun’un babası mezbûr el-Hâc Mehmed Sâdık Efendi vekâleten meclis-i şer‘-i münîrde sâhib-i arzuhâl Yusuf Ağa b. Ahmed mahzarında merkūm Yusuf Ağa kızım ve müvekkilem merkūme Şerîfe Fâtıma Hatun’un zevc-i dâhili olup lâkin beynlerinde hüsn-i mu‘âşeretleri olmamağla zimmetinde mütekarrir ve ma‘kūdun aleyh olan dört yüz yirmi beş guruş mehr-i müeccelli zevc-i merkūm bana def‘ ve teslîm ben dahi bi’l-vekâle kabz eylediğimden sonra kızım ve müvekkilem merkūmenin nafaka-i iddet-i mu‘ayyene-i ma‘lûmesi üzerine ve meûnet-i süknâsı dahi kendi üzerine olmak üzere kızım ve müvekkilem merkūmeye izâfetle zevci merkūm ile muhâla‘a-i sahîha-i şer‘iyye ile hul‘ olduğumda ol dahi hul‘-ı mezkûru ba‘de’l-kabûl hukūk-ı zevciyyete ve ibtidâ-yı zevciyetlerinden işbu târih-i i‘lâma gelince beynlerinde cereyân eden cemî‘i ahz u i‘tâya vesâir hukūk-ı şer‘iyyeye müte‘allika âmme-i de‘âvî ve kâffe-i mütâlebâtdan ben bi’l-asâle ve bi’l-vekâle merkūm Yusuf Ağa’nın zimmetini ibrâ ve iskāt eylediğimde ol dahi bir re’s zenciye câriyeden mâ‘adâ hukūk-ı zevciyete ve ibtidâ-yı zevciyetlerinden işbu târihe gelince beynlerinde cereyân eden cemî‘i ahz u i‘tâya müte‘allika âmme-i de‘âvî ve kâffe-i mütâlebâtdan benimle kızım ve zevcem müvekkiletân-ı mezbûretânın zimmetlerini ibrâ ve iskāt ve her birimiz ber-vech-i muharrer âharın ibrâsını asâleten ve vekâleten kabûl eyledik deyü ikrâr ve tasdîkleri bi’t-terâzi tescîl ve İslâmbol Mahkemesi’nden huzûr-ı âlîlerine i‘lâm olundu. Fî-21 min-Zilka‘de sene [1]216