İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 177 Hüküm no: 167 Orijinal metin no: [22b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saatçi Anton v. Lütfi ile Saatçi Mehmed b. Abdullah’ın vârislerinin bir birlerinin zimmetleri ibra ederek sulh oldukları Sa‘atçi gediğinden 150 guruşa sulh Ma‘rûz İslâmbol’da Dıraman kurbünde sâkin iken üç sene mukaddem vefât eden Sa‘atçi Mehmed b. Abdullah’ın verâseti zevcesi Lebibe bt. Abdullah ile sulbî kebîr oğlu Ahmed ve sagīr Mehmed Tahir ve sulbiye-i kebîre kızları Necibe ve Şâkire ve Mecnûne Zeliha’ya ba‘de’l-inhisâr ashâb-ı arzuhâl zâtları ta‘rîf-i şer‘î ile mu‘arrefe olan zevce-i mezbûre Lebibe ve mezbûretân Necibe ve Şâkire asâleten ve sagīr-i mezbûr Mehmed Tahir ile mecnûne-i mezbûre Zeliha’nın hâleteleri ve tesviye-i emirlerine kıbel-i şer‘den mansûbe vasîleri olan kezâlik zâtı mu‘arrefe Sâliha bt. Abdullah nâm hatundan her biri meclis-i şer‘-i münîrde mezbûr Ahmed hâzır olduğu hâlde zikri âtî gedik âlâtına vaz‘-ı yedi mütehakkık olan Sa‘atçi Anton v. Lütfi nâm zimmî muvâcehesinde İslâmbol’da Çukacılar Hânı tahtında vâki‘ bir bâb sa‘atçi dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme zevcim ve mûrisimiz müteveffâ-i merkūm Mehmed’in hayatında mülkü olmağla âlât-ı mezkûreyi mecnûn olduğu hâlde mersûm Anton zimmîye yedi yüz seksen guruş semen-i makbûza bey‘ ve teslîm ve kable’l-ifâka fevt olup ve biz bey‘ini mücîze olmamızla âlât-ı mezkûreyi istirdâd ederiz deyü da‘vâya tasaddî eylediğimizde ol dahi cevâbında babanız ve mûrisiniz merkūm tammü’l-akl olduğu hâlde bana bey‘ etmişdi deyü da‘vâ ve müdde‘âsına iki nefer şâhid ikāme etmekle biz dahi cünûnu tevâtür ile isbât ederiz deyü şâhide havâle olunmuşduk el-hâletü hâzihi tevâtüre bizim şâhidlerimiz olmamağla sulh sagīr ve mecnûn-ı mezbûr haklarında her vechile evlâ ve enfa‘ olduğuna binâen biz tasaddî eylediğimiz da‘vâ-yı mezkûremizden mersûm Anton zimmî ile yüz elli guruşa bi’l-asâle ve bi’l-vesâye sulh olduğumuzda ol dahi sulh-i mezkûru ba‘de’l-kabûl bedel-i sulh olan yüz elli guruşu dahi işbu meclis-i şer‘de bize def‘ ve teslîm biz dahi yedinden bi’l-asâle ve bi’l-vesâye ba‘de’l-kabz zikr olunan gedik âlâtına ve bi’l-cümle husûs-ı mezkûra müte‘allika âmme-i da‘vâdan biz ve hâzır-ı merkūm Ahmed’den her birimiz mersûm Anton zimmînin zimmetini ibrâ ve iskāt eylediğimizde ol dahi ibrâmızı kabûl eyledi fîmâ ba‘d âlât-ı gedik-i mezkûra müte‘allika mersûm Anton zimmî ile bi’l-asâle ve bi’l-vesâye da‘vâ ve nizâ‘ ve husûmetimiz kalmadı deyü mukırrât-ı mezbûrâtın takrîr-i meşrûhlarını hâzır-ı merkūm Ahmed ve mersûm Anton zimmîden her biri tasdîk ve bu vechile kat‘-ı nizâ‘ eyledikleri İslâmbol Mahkemesi’nden huzûr-ı âlîlerine i‘lâm olundu. Fî-19 min-Zilka‘de sene [1]216