İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 178 Hüküm no: 168 Orijinal metin no: [22b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi esnafı’nın, Avanis, Lütfü v. Serkiz ve Asvador’dan şikâyetçi olmaları Terzi esnâfı şikâyetlerini tehîr Ma‘rûz İslâmbol’da Ali Paşa Hânında mütemekkinler terzi esnâfından yiğitbaşı Mihail ve Mardıros v. Kirkor ve Mericek ve Karabet ve Abraham ve Manok ve Begos ve Ohan ve Estefan ve Kerube ve Karabet ve Haçador ve Kirkor ve Nikogos ve Anberson ve diğer Begos ve diğer Kerube nâm zimmîler meclis-i şer‘-i münîrde Avanis v. Serkiz ve Lütfü v. Mardıros ve Bedros v. Mardıros ve Haçador v. Serkiz ve Asvador v. Nazar nâm zimmîler muvâcehelerinde mesfûrûn Avanis ve Lütfü ve Bedros ve Haçador ve Asvador nâm zimmîler kendi hallerinde olmayıp umûr-u [e]snâfa müdâhale ve ihtilâl-i nizâmımıza bâ‘is ve beynimizde tefrikaya bâdi olmalarıyla mesfûrûndan emniyet ve rahatımız yokdur deyü teşekkî eylediklerinde mesfûrûn dahi fîmâ ba‘d kendi kesbleriyle meşgūl ve umûr-ı esnâfa karışmamak üzere her biri ta‘ahhüd eylediklerinde mesfûrûn dahi râzılar olup şikâyetlerini tehîr eyledikleri İslâmbol Mahkemesi’nden huzûr-ı âlîlerine i‘lâm olundu. Fi’l-yevmi’t-tâsi‘ aşar min-Zilka‘deti’ş-şerîfe li-sene sitte aşara ve mi’eteyn ve elf [19 Zilka‘de 1216]