İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 178 Hüküm no: 169 Orijinal metin no: [23a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi esnafından Avanis v. Serkiz’in, Estefan v. Minas’da olan alacağına Mardros’un kefil olduğu 1200 guruş imhâl Ma‘rûz Terzi esnâfından olup İslâmbol’da Ali Paşa Hânı’nda mütemekkin Avanis v. Serkiz zimmî meclis-i şer‘-i münîrde Agob v. Manuk zimmî hâzır olduğu hâlde Estefan v. Minas zimmî muvâcehesinde bin iki yüz on beş senesi Recebi’l-ferdinin yirmi birinci günü mersûm Estefan zimmî hân-ı mezkûrun sağ tarafında tabaka-i vustâsında vâki‘ bir bâb oda derûnunda mevcûde beyne’l-esnâf gedik tâ‘bir olunur bir mikras ve bir destgâh vesâir âlât-ı lâzıme-i ma‘lûmeden mâlik olduğu nısf hissesini bin altı yüz guruşa bana bey‘ ve teslîm ben dahi iştirâ ve kabz eyledğimden sonra âlât-ı mezkûreyi hâzır-ı mersûm Agob zimmîye iki bin guruşa bey‘ ve teslîm etmişdim el-hâletü hâzihi hâzır-ı mersûm ile bey‘i fesh ve ikāle ve âlât-ı mezkûreyi ben kabz eylediğimden sonra mersûm Estefan zimmî ile dahi bey‘i fesh ve ikāle ve nısf-ı âlât-ı mezkûreyi kendiye teslîm edip ve semeni olmak üzere kendiye medfû‘um olan bin altı yüz guruşun dört yüz guruşunu mersûm Estefan zimmîye sahîhan hibe etmemle ol dahi ba‘de’l-kabûl bâkīsi olan bin iki yüz guruşu dahi târih-i i‘lâmdan bir sene tamamına değin bana edâ etmek üzere rızâmla mersûm Estefan zimmî istimhâl eylediğinde ben dahi rızâmla imhâl ve te’cîl eyledim deyü takrîrini hâzır-ı mersûm Agob ve mersûm Estefan zimmîden her biri tasdîk eylediklerinden sonra meblağ-ı bâkī-i mezkûr bin iki yüz guruşun ecel-i mezkûr hulûlünde edâsına hâzır bi’l-meclis Mardros v. Serkiz zimmî bi’l-emr ve’l-kabûl kefîl ve zâmin olup ol dahi kefâletini kabûl eylediği İslâmbol Mahkemesi’nden huzûr-ı âlîlerine i‘lâm olundu. Fî-19 min-Zilka‘de sene [1]216