İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 179 Hüküm no: 170 Orijinal metin no: [23a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kırımlı Muhyiddin Ahmed Efendi vakfı’na ait Canbâz ahırını Fâtıma bt. Halil’in kiraladığı Canbâz ahırı Ma‘rûz Sâdır olan fermân-ı âlîlerine imtisâlen zikri âtî husûsun bi’l-mu‘âyene fasl ve hasmı için kıbel-i şer‘den mürsel Kâtib-i sâni Merhabâzâde Mahmud Efendi hâssa mimarı hulefâlarından es-Seyyid Mustafa ve Mehmed halîfeler ile İstanbul’da haffâfhâne civârında Dülgerzâde Mahallesinde vâki‘ Muhyiddin Kırımî Ahmed Efendi vakfından olan canbaz ahırına varıp cerîdede mazbûtü’l-esâmî Müslimîn huzûrlarında akd-i meclis-i şer‘-i kavîm eyledikde vakf-ı mezbûrun mütevelliyesi Şerîfe Ümmühani Hatun’un vekîl-i şer‘îsi es-Seyyid Mehmed Emin b. Mehmed meclis-i ma‘kūd-ı mezkûrda zikr olunan ahıra bi’l-îcâreteyn mutasarrıfe olan sâhibe-i arzuhâl mu‘arrefetü’z-zât Fâtıma bt. Halil nâm Hatun hâzıra olduğu hâlde derûn-ı arzuhâlde mezkûrü’l-ism el-Hâc Abdullah b. Salih mahzarında mezbûr el-Hâc Abdullah târih-i i‘lâmdan yirmi iki gün mukaddem işbu derûnunda akd-i meclis olunan canbaz ahırının ittisâlinde kâin mülkü olan bahçesinin mevcûd sed duvarı zemîninden iki zirâ‘ mikdârı hafr ve ahır-ı mezkûrun temeli taşlarını ihrâc ve ol vechile te‘addîsinden nâşî mimârân-ı mezbûrân misâhalarıyla tûlen sekiz zirâ‘ ve arzan bir zirâ‘ ve kadden altı zirâ‘ sed duvar ve üzerinde mevcûd tûlen on bir zirâ‘ ve arzan sekiz zirâ‘ altı parmak samanhâne ve arpa ambarı binâsı münhedim olmağla enkâz-ı mevcûdesi kıymetiyle mebniyyen kıymetinin noksanını taleb ederim deyü da‘vâ eylediğimde ol dahi ber-vech-i muharrer te‘addîsini ikrâr ve kıymeteyn-i mezkûreteyn beyninde mimârân-ı mezkûrânın haberleri üzere tefâvüt eden yüz elli guruşu cânib-i vakıf için vermeğe rızâsıyla ta‘ahhüd etmekle meblağ-ı mezkûrdan mâ‘adâ husûs-ı mezkûra müte‘allika merkūm el-Hâc Abdullah ile müvekkilem mezbûrenin da‘vâ ve nizâ‘ ve husûmeti kalmadı deyü ba‘de’l-ikrâr ve’t-tasdîk vekîl-i merkūm yine meclis-i ma‘kūd-ı mezkûrda mezbûr el-Hâc Abdullah zimmetinde olan yüz elli guruşu merkūmdan ahz ve ke’l-evvel binâya müvekkilem mütevelliye-i mezbûre Şerîfe Ümmühani Hatun müstecire-i mezbûre Fâtıma Hatun’a emir ve tevkîl eylediğinde ol dahi kabûl ve ke’l-evvel binâya ta‘ahhüd eylediğini mevlânâ-yı mezbûr mahallinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihi inhâ ve takrîr eylediği İstanbul Mahkemesi’nden huzûr-ı âlîlerine i‘lâm olundu. Fî-19 min Za sene [1]216