İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 180 Hüküm no: 171 Orijinal metin no: [23a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe hatunun, Mustafa Efendi’nin evinin yol tarafından kapısının önüne yaptığı binâyı kaldırması gerektiği Ma‘rûz Sâdır olan fermân-ı âlîlerine imtisâlen cânib-i şer‘-i enverden mürsel Süleyman Efendi Haremeyni’ş-şerîfeyn müfettişi müderrisîn-i kirâmdan Mehmed Atâullah Efendi tarafından mürsel es-Seyyid Atâullah Efendi ile hâssa mimarı hulefâlarından Mustafa ve Ali Halîfeler ile İstanbul’da Ebulfeth Sultan Mehmed Han —aleyhi’r-rahmeti ve’l-Gufrân— hazretleri câmi‘-i şerîfi kurbünde Pirinççi Sinan Mahallesi’nde vâki‘ münâza‘un fîh mahalle varıp mazbûtü’l-esâmî Müslimîn huzûrlarında akd-i meclis-i şer‘-i kavîm ettikde sâhib-i arzuhâl Mustafa Efendi meclis-i ma‘kūd-ı mezkûrda Hâfız Ahmed Paşa mütevellîsi Mustafa Ağa tarafından mürsel İsmail Efendi hâzır olduğu yine vakf-ı mezbûrdan ittisâlinde kâin bir bâb menzile bi’l-îcâreteyn mutasarrıfe Âişe bt. Ali nâm Hatun’un hâlâ zevci ve tarafından husûs-ı âti’l-beyânda vekîl olduğu zât-ı mezbûreyi ârifân Mustafa Efendi b. Ebûbekir ve Abdullah b. İbrahim şehâdetleriyle sâbit olan Eyüb Ağa b. Mustafa ile terâfu‘larında müvekkile-i mezbûre Âişe Hatun benim mutasarrıf olduğum menzilimin tarîk-i has tarafında olan kapı önüne mimârân-ı mezbûrân mesâhalarıyla tûlen altı zirâ‘ on altı parmak ve arzan bir zirâ‘ on altı parmak mahalle fuzûlî binâ ihdâs etmekle tarîk üzerinde olan binâsını ref‘e vekîl-i mezbûra tenbîh olunmak murâdımdır deyü da‘vâ ettikde vekîl-i mezbûr dahi mahâll-i mezkûr tarîk-i has ve binâ-i mezkûr muhdes olduğunu bi’l-vekâle ikrâr u i‘tirâf etmeğin mûcebince muhdes olan binâyı tarîk-i mezkûr üzerinden ref‘ etmek üzere müvekkile-i mezbûre için vekîl-i mezbûra tenbîh eylediklerini mevlânâ-yı mezbûr mahallinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ<< ve tahrîr ve ma‘an mürsel ümenâ-i şer‘le>> ve takrîrlerini ba‘de’t-tenfîz huzûr-ı âlîlerine i‘lâm olundu. Fî-23 Za sene [1]216