İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 181 Hüküm no: 172 Orijinal metin no: [23b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosis Velesto v. Marko’nun, bedel-i sulh karşılığında Molla Mustafa b. Mustafa ile anlaştığı Bedel-i sulh 3.000 guruş hüküm Ma‘rûz Arzuhâlde mastûrü’l-ism Rusyalı himâyesinde çukacı Mosis Velesto v. Marko zimmî bi’t-terâzi meclis-i şer‘-i münîrde tüccârdan sâhib-i arzuhâl Molla Mustafa b. Mustafa mahzarında merkūm Molla Mustafa zimmetinde bin iki yüz on iki senesi Zilka‘deti’ş-şerîfe gurresi târihiyle muvarrah imzâ ve hatmini hâvi yedime i‘tâ eylediği işbu bir kıt‘a deyn temessükü nâtık olduğu üzere zirâ‘ ve mikdârı beynimizde ma‘lûm çuka ve tonbak zarf ve fincan semenlerinden on beş bin dört yüz kırk dokuz guruş alacağım olmağla meblağ-ı mezkûru hâlâ taleb ederim deyü tasaddî eylediğim da‘vâmdan bâ-tavassut-ı muslihîn merkūm Molla Mustafa ile an ikrâr üç bin guruş üzerine sulh olduğumda ol dahi sulh-i mezkûru ba‘de’l-kabûl bedel-i sulhten mâ‘adâ ziyâde müdde‘âma müte‘allika âmme-i da‘vâdan merkūm Molla Mustafa’nın zimmetini kabûlü hâvi ibrâ ve iskāt eyledim deyü takrîrini merkūm Molla Mustafa tasdîk eylediğinden sonra bedel-i sulh-i mezkûr üç bin guruşu müdde‘î-i mersûm Mosis Desto zimmîye edâ ve teslîme merkūm Molla Mustafa’ya tenbîh olunduğu huzûr-ı âlîlerine i‘lâm olundu. Fî-23 min-Zilka‘de sene [1]216