İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 181 Hüküm no: 173 Orijinal metin no: [23b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Cerrah Seyyid Nuri b. Ahmed’in, yanlışlıkla sağlam dişini çektiği Mustafa b. Ahmed ile sulh olduğu Diş da‘vâsından 35 guruşa sulh Ma‘rûz Mustafa b. Ahmed meclis-i şer‘-i münîrde Cerrâh halîfesi es-Seyyid Mehmed Nuri b. es-Seyyid el-Hâc Ahmed mahzarında ağzımın sol tarafında olup vec‘i olan azı dişimi çıkar deyü ta‘yîn ederek mezbûr es-Seyyid Mehmed Nuri’ye emr eylediğimde ol dahi ta‘yîn eylediğim diş ile yanında olan sağ bir dişimi hatâen ihrâc etmekle mûceb-i şer‘îsini taleb ederim deyü tasaddî eylediğim da‘vâmdan mezbûr es-Seyyid Mehmed Nuri ile an ikrâr otuz beş guruş bedel-i makbûza ba‘de akdi’l-musâlahati ve’l-kabûl ziyâde diyete müte‘allika da‘vâdan mezbûr es-Seyyid Mehmed Nuri’nin zimmetini kabûlü hâvi ibrâ ve iskāt eyledim deyü ikrâr ve tasdîkleri tescîl ve İslâmbol Mahkemesi’nden huzûr-ı âlîlerine i‘lâm olundu. Fî-23 min Za sene [1]216