İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 182 Hüküm no: 175 Orijinal metin no: [23b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kokona bt. Kastanti’nin, Halil Ağa b. Hüseyin’e olan borcunu ödemesi gerektiği Fekk-i rehn Ma‘rûz Arzuhâlde mezkûr Halil Ağa b. Hüseyin meclis-i şer‘-i münîrde arzuhâl eden mu‘arrefetü’ş-şahs Kokona bt. Kostanti nâm Nasrâniye muvâcehesinde mersûme Kokona Nasrâniye bundan akdem malımdan ve yedimden iktirâz ve kabz eylediği iki yüz elli guruş mukābelesinde iki kıt‘a pullu kumaş ve bir çift bilezik ve altmış guruş mukābelesinde dahi bir elmas çiçek ve yüz elli guruş mukābelesinde dahi bir elmas yüzük ve bir gülabdân ma‘a sim buhûrdan yedime rehin vaz‘ ve teslîm etmişdi el-hâletü hâzihi deyn-i mezkûrları olan cem‘an dört yüz altmış guruşu edâ ile rehân-ı mezkûreyi fek ve tahlîse mersûme Kokona Nasrâniyeye tenbîh olunmak murâdımdır deyü da‘vâ eylediğimde ol dahi cevâbında rehân-ı mezkûreyi vaz‘ıyla yedimden ol mikdâr guruş iktirâz ve kabzını ikrâr lâkin mebâliğ-i mezkûreden bir elmas yüzük ve bir sim gülabdân ma‘a sim buhûrdan rehniyle iktirâz eylediğim yüz elli guruşu sana edâ etmemle rehân-ı mezkûreyi taleb ederim deyü ol mikdârında beni def‘a tasaddî ve bu vechile beynimizde ba‘de vukū‘ı’l-münâza‘a bâ-tavassut-ı muslihîn ben tasaddî eylediğim meblağ-ı mecmû‘-ı mezkûr dört yüz altmış guruş da‘vâmdan üç yüz on guruşa sulh olduğumda ol dahi sulh-i mezkûru ba‘de’l-kabûl bedel-i sulhden mâ‘adâ ziyâde müdde‘âma müte‘allika âmme-i da‘vâdan mersûme Kokona Nasrâniyenin zimmetini kabûlü hâvi ibrâ ve iskāt eylediğimden sonra rehân-ı mezkûreden bir elmas yüzük ve bir gülabdân ma‘a buhûrdânı rehniyetden fek ve mersûme Kokana Nasrâniyeye teslîme ta‘ahhüd eyledim deyü takrîrini mersûme Kokona Nasrâniye ba‘de’t-tasdîk bedel-i sulh-ı mezkûr üç yüz on guruşu müdde‘î-i merkūm Halil Ağa’ya edâ ile rehhân-ı bâkīlerini dahi fek ve tahlîse mersûme Kokona Nasrâniye’ye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min-Zilka‘de sene [1]216