İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 183 Hüküm no: 176 Orijinal metin no: [23b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mustafa b. İsmail’in, Yova v. Vanil’e olan borcunu ödeyerek sulh olduğu 250 guruşa sulh Ma‘rûz Arzuhâl eden Yuda v. Danil nâm Yahûdi meclis-i şer‘-i münîrde Peynirci es-Seyyid Mustafa b. el-Hâc İsmail mahzarında mersûme Yuda Yahûdi’nin karındaşı İşo Yahûdi hâzır olduğu hâlde ben bundan akdem Silivri kazâsından otuz dört sepet derûnuna vaz‘ ve merkūma irsâl eylediğim bin dört yüz altmış dört vakıyye peyniri âhara bey‘ ve semeninden işbu hâzır bi’l-meclis es-Seyyid Ömer’e deynim olan dört yüz otuz guruşu edâ ve bâkīsini bana vermek üzere merkūm es-Seyyid Mustafa’ya emir ve tevkîl etmişdim el-hâletü hâzihî zikr olunan peyniri dört yüz elli iki guruş otuz paraya bey‘ ve kabz-ı semen edip deyn-i mezkûruma vermeyip hâlâ yedinde olmağla meblağ-ı mezkûr ile karzdan alacağım olan yirmi guruş ve iki aded kuzu semeninden dahi altı buçuk guruş ki cem‘an dört yüz yetmiş dokuz guruş otuz parayı taleb ederim deyü da‘vâ eylediğimde ol dahi cevâbında ancak yirmi altı sepet olarak altı yüz yetmiş beş vakıyye peynir kabzını ikrâr ziyâde müdde‘âmı inkâr etmekle beynimizde ba‘de vukū‘ı’l-münâza‘a bâ-tavassut-ı muslihîn ben tasaddî eylediğim da‘vâ-yı mezkûrelerimden mezbûr es-Seyyid Mustafa ile kat‘an li’n-nizâ‘ iki yüz elli guruşa sulh olduğumda ol dahi sulh-ı mezkûru ba‘de’l-kabûl bedel-i sulhden mâ‘adâsına müte‘allika da‘vâdan merkūmun zimmetini kabûlü hâvi ibrâ ve iskāt eyledim deyü ba‘de’l-ikrâr ve’t-tasdîk bedel-i sulh-ı mezkûr iki yüz elli guruşu müdde‘î-i mersûm Yuda Yahûdi’ye edâ ve teslîme mezbûr es-Seyyid Mustafa’ya tenbîh olunduğu huzûr-ı âlîlerine i‘lâm olundu. Fî-23 min-Zilka‘de sene [1]216