İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 184 Hüküm no: 177 Orijinal metin no: [24a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sima bt. Vakes’in, Kokona bt. Kastanti’ye olan borcunu ödediğinden rehninin kaldırılması gerektiği Rehin teslîmine tenbîh Ma‘rûz Havâss-ı Refî‘a kazâsına muzâfe Hasköy kasabasında Abdüsselam Mahallesi’nde mütemekkine arzuhâl eden Sima bt. Dakis v. Ohannes nâm Nasrâniye tarafından husûs-ı âti’l-beyânda vekîl olduğu şahsını ârifân Bedros v. Kirkor ve Kostanos v. Ohan nâm zimmîler şehâdetleriyle sâbit olan Serkiz v. Agob zimmî meclis-i şer‘-i münîrde arzuhâlde mastûre şahsı mu‘arrefe Kokona bt. Kostanti nâm Nasrâniye muvâcehesinde müvekkilem mesfûre Sima Nasrâniye bundan akdem âhar kimesneye rehin vaz‘ıyla kendiye yüz elli guruş karz alıvermek üzere malından bir elmas yüzük ve bir sim gülabdân ma‘a sim buhûrdanını mesfûre Kokona Nasrâniye’ye def‘ ve teslîm ol dahi ba‘de’l-kabz eşyâ-i mezkûreyi işbu hâzır bi’l-meclis Halil nâm kimesneye rehin vaz‘ıyla yüz elli guruş ahz edip müvekkilem mezbûreye teslîm etmişdi el-hâletü hâzihi müvekkilem mersûme Sima Nasrâniye makbûzu olan yüz elli guruşu mesfûre Kokona Nasrâniyeye edâ etmekle rehân-ı mezkûreyi rehniyetden fek ve müvekkilem mezbûreye teslîme mersûme Kokona Nasrâniye’ye tenbîh olunmak bi’l-vekâle murâdımdır deyü da‘vâ ettikde ol dahi cevâbında müdde‘î-i vekîl-i mezbûrun ber-vech-i muharrer müdde‘âsını bi-tamâmihî ikrâr u i‘tirâf etmeğin mûcebiyle zikr olunan elmas yüzük ve sim gülabdân ve buhûrdânı rehniyetden tahlîs ve müvekkile-i mesfûre Sima Nasrâniye için vekîl-i mersûma teslîme mesfûre Kokona Nasrâniye’ye tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-23 min-Zilka‘de sene [1]216