İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 185 Hüküm no: 180 Orijinal metin no: [24a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüfenkçibaşı Mehmed Ağa b. Ahmed’in, Hüseyin Efendi b. Ömer’den haksız yere aldığı parayı ödemesi gerektiği 218 guruş hüküm Ma‘rûz Vilâyet-i Anadolu’da Isparta kazâsına tâbi‘ Pavlo nâm karye ahâlîsinden el-Hâc Hüseyin Efendi b. Ömer Efendi b. Abdullah tarafından husûs-ı âtî’l-beyânda taleb ve da‘vâ ve ahz u kabza vekîl olduğu karye-i mezbûre ahâlîsinden Abdullah b. el-Hâc Ömer ve Mehmed b. Osman şehâdetleriyle sâbit olan Yoğurtçu Ahmed b. Mehmed nâm kimesne meclis-i şer‘-i münîrde Mehmed Ağa b. Ahmed nâm kimesne muvâcehesinde merkūm Mehmed Ağa mârru’z--zikr Isparta kazâsı müteselliminin tüfenkçibaşısı olmağla işbu sene-i mübâreke Şa‘banının on ikinci günü müvekkilem mezbûr el-Hâc Hüseyin Efendi’yi bir-takrîb ahz ve kırk gün habsedip ve bi-gayr-ı hakkın müvekkilem mezbûrun yedinden ve malından iki yüz on sekiz guruşunu ahz etmekle meblağ-ı mezkûr iki yüz on sekiz guruşu bi’l-vekâle istirdâd ederim deyü da‘vâ ettikde mezbûr Mehmed Ağa dahi külliyen inkâr etmekle müdde‘î-i vekîl-i merkūm ber-vech-i muharrer müdde‘âsını karye-i mezbûre sükkânından lede’t-tezkiye adâletleri zâhir olan es-Seyyid Hasan b. es-Seyyid Osman ve Yusuf b. el-Hâc Ahmed nâm kimesneler şehâdetleriyle vech-i şer‘î üzere isbât etmeğin mûcebince meblağ-ı mezkûr iki yüz on sekiz guruşu müvekkil-i mezbûr el-Hâc Hüseyin Efendi için vekîl-i merkūm Ahmed’e edâ ve teslîme mezbûr Mehmed Ağa’ya tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-24 min Za sene [1]216