İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 186 Hüküm no: 181 Orijinal metin no: [24a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esma bt. Abdullah’ın, kocası Molla Ahmed bin Mehmed’e kendisini bakması şartıyla verdiği arsayı geri alması Nısf-ı arsayı geriye ferağa tenbîh Ma‘rûz Sâhibe-i arzuhâl alîle Hâce Esma bt. Abdullah nâm hatun tarafından husûs-ı âti’l-beyânda vekîl olduğu zâtını ârifân İsmail b. Ali ve el-Hâc Mehmed b. Ahmed şehâdetleriyle sâbit olan İsmail Efendi b. Mustafa bi’l-ma‘iyye rü’yete memûr Haremeyni’ş-şerîfeyn müfettişi müderrisîn-i kirâmdan Mehmed Atâullah Efendi tarafından mürsel es-Seyyid Mustafa Tahir Efendi ve Haremeyn mütevellîsi hâcegân-ı dîvân-ı hümâyûndan Osman Efendi tarafından vekîli câbi-i vakıf el-Hâc Mustafa hâzır olduğu hâlde meclis-i şer‘-i münîrde müvekkile-i mezbûrenin hâlâ zevci arzuhâlde mezkûr Hâfız Molla Ahmed b. Mehmed mahzarında müvekkilem mezbûre Esma Kadın Haremeyni’ş-şerîfeyn vakfından İslâmbol’da Abdisubaşı Mahallesi’nde vâki‘ basmahâne arsasında mutasarrıfe olduğu nısf hissesini bin iki yüz on beş senesi Recebi’l-ferdi târihinde ölünce kendiye bakmak şartıyla zevci merkūm Molla Ahmed’e bâ-re’y-i mütevellî ferağ ve tefvîz etmişdi el-hâletü hâzihi şart-ı mezkûr ile olan ferağın adem-i sıhhatine binâen nısf-ı arsa-yı mezkûreden keff-i yed ve müvekkilem mezbûreye bâ-re’y-i mütevellî geri ferağa merkūm Molla Ahmed’e tenbîh olunması müvekkilem mezbûrenin matlûbudur dedikde ol dahi cevâbında zevcem müvekkile-i mezbûre alîle Esma Kadın mutasarrıfe olduğu nısf hissesini seksen guruş bedel mukābelesinde bana sahîhan ferağ etmişdi deyip vekîl-i mezbûrun ber-vech-i muharrer şart-ı müdde‘âsını inkâr etmekle müdde‘î-i vekîl-i mezbûr ber-vech-i muharrer şart müdde‘âsını lede’t-tezkiye adl ve makbûlü’ş-şehâde idükleri ihbâr olunan ruznâmçe-i askerî kalemi reisi Hâfız Abdullah Efendi b. Halil ve Kundakçı İsmail Beşe b. Ali nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebiyle nısf arsa-yı mezkûreden keff-i yed ve bâ-re’y-i mütevellî müvekkile-i mezbûreye geri ferağa zevc-i merkūm Molla Ahmed’e tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-21 min-Zilka‘de sene [1]216