İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 187 Hüküm no: 182 Orijinal metin no: [24b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sabuncu Nikola’nın, sabun tüccarından Çavuşoğlu Molla Mehmed ve diğerlerine olan borcunu ödemesi gerektiği 1367,5 guruş hüküm Ma‘rûz İslâmbol’da Odunkapısı dâhilinde Sabuncu Kabasakal oğlu Lazari ve Saibe ve Anaştaş ve Kostandi ve Aslan ve Kiryako ve Simon nâm zimmîler meclis-i şer‘-i münîrde Galata’da Sabuncu Nikola nâm zimmî muvâcehesinde mersûm Nikola zimmînin sabun tüccârından Çavuşoğlu Molla Mehmed’e dokuz yüz yirmi üç guruş ve Kuklakî Mustafa Ağa’ya yüz altmış beş guruş ve Mücellid Mehmed Emin Ağa’ya iki yüz altı guruş ve İmâmoğlu Derviş Ali’ye yetmiş üç buçuk guruş deyne bi’l-emr ve’l-kabûl biz kefîl ve zâmin olmamızla meblağ-ı mezkûr dokuz yüz yirmi üç guruşu mezbûr Molla Mehmed’e ve yüz altmış beş guruşu mezbûr Mustafa Ağa’ya ve iki yüz altı guruşu merkūm Mehmed Emin Ağa’ya ve yetmiş üç buçuk guruşu mezbûr Derviş Ali’ye cem‘an bin üç yüz altmış yedi buçuk guruş deynini kefâletimize binâen edâ etmemizle meblağ-ı mecmû‘-ı mezkûru mesfûr Nikola zimmîden bi’l-mürâca‘a taleb ederiz deyü da‘vâ ettiklerinde mesfûr Nikola zimmî dahi cevâbında müdde‘ûn-ı mesfûrûnun ber-vech-i muharrer müdde‘âlarını ikrâr u i‘tirâf etmeleriyle mûcebince meblağ-ı mecmû‘-ı mezkûr bin üç yüz altmış yedi buçuk guruşu müdde‘ûn-ı mesfûrûna edâsıyla mesfûr Nikola zimmî ilzâm olunduğu İslâmbol Mahkemesi’nden huzûr-ı âlîlerine i‘lâm olundu. Fî-11 min-Zilka‘de sene [1]216