İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 187 Hüküm no: 183 Orijinal metin no: [24b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çolak Yani v. Nikola’nın, Sultan Abdülhamid Han vakfından kiraladığı kasap dükkânını Mustafa bin Ali’ye devrettiği Kasab ferağı Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretleri evkāfı musakkafâtından Yedikule hâricinde vâki‘ altıncı selhhâneye merbût İslâmbol’da Kocaçınar kurbünde sebîl karşısında bir bâb kasab dükkânı gediğine bâ-temessük-ı mütevellî mutasarrıf olan Çolak Yani v. Nikola zimmî meclis-i şer‘-i münîrde hâssa kasabbaşısı Mustafa Ağa tarafından vekîli kasablar kethüdâsı Seyyid Halil Ağa ve ustalarından mazbûtü’l-esâmî kimesneler hâzır oldukları hâlde ustalığı idâreye kādir idüğü ihbâr olunan Mustafa b. Ali muvâcehesinde takrîr-i kelâm edip ben ber-vech-i muharrer mutasarrıf olduğum dükkân-ı mezkûr derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmelerimin bedel-i misli olan bin yüz guruş bedel-i makbûz mukābelesinde merkūm Mustafa’ya bâ-re’y-i mütevellî ferağ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm gedik tâ‘bir olunan âlât-ı lâzımelerde benim alâka ve medhalim kalmayıp merkūm Mustafa’nın hakk-ı müfevvezi olmuşdur dedikde ol dahi ba‘de’t-tasdîk zikr olunan âlât-ı lâzıme-i ma‘lûmeler merkūm Mustafa’nın üzerine defter-i vakfa kaydolunup yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-25 min Za sene [1]216