İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 188 Hüküm no: 184 Orijinal metin no: [24b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hâfız Mehmed bin Mustafa’nın, Sultan Abdülhamid Han vakfından kiraladığı kasap dükkânını Mustafa bin Salih’e devrettiği Kassab ferağı Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretleri evkāfı musakkafâtından Yedikule hâricinde vâki‘ yedinci selhhâneye merbût İslâmbol’da tavukpazarı ortasında kâin bir bâb kasab dükkânı gediğine bâ-temessük-ı mütevellî mutasarrıf olan Hâfız Mehmed b. Mustafa meclis-i şer‘-i münîrde hâssa kasabbaşısı Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî kimesneler hâzır oldukları hâlde ustalığı idâreye kādir idüğü ihbâr olunan Mustafa b. Salih muvâcehesinde takrîr-i kelâm edip ben ber-vech-i muharrer mutasarrıf olduğum âlât-ı lâzıme-i ma‘lûmenin nısfını yedimde ibkā ve nısf-ı âharını bedel-i makbûz mukābelesinde merkūm Mustafa’ya bâ-re’y-i mütevellî vakf ferağ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm gedik tâ‘bir olunur âlât-ı lâzımelerin nısfında benim alâka ve medhalim kalmayıp merkūm Mustafa’nın hakk-ı müfevvezi olmuşdur dedikde ol dahi ba‘de’t-tasdîk zikr olunan âlât-ı lâzıme-i ma‘lûmelerin nısfı mezbûr Mustafa’nın üzerine defter-i vakfa kaydolunup yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-25 min-Zilka‘de sene [1]216