İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 188 Hüküm no: 185 Orijinal metin no: [24b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah b. Hasan’ın, Sultan Abdülhamid Han vakfından kiraladığı kasap dükkânını Süleyman bin Ahmed’e devrettiği Kassab ferağı Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretleri [evkāfı] musakkafâtından Yedikule hâricinde vâki‘ beşinci selhhâneye merbût İslâmbol’da Kumkapı dâhilinde Nişancı mahalleseinde simitçi dükkânına muttasıl bir bâb kasab dükkânı derûnunda mevcûde gedik tâ‘bir olunur âlât-ı lâzıme-i ma‘lûmeye bâ-temessük-ı mütevellî mutasarrıf olan Abdullah b. el-Hâc Hasan tarafından ber-vech-i âtî ferağa vekîl olduğu Kuçaş es-Seyyid Mehmed b. Ahmed ve Kahveci es-Seyyid Mehmed b. Mahmud haberleriyle zâhir Hüseyin Ağa b. el-Hâc Ali meclis-i şer‘-i münîrde hâssa kasabbaşısı Mustafa Ağa tarafından vekîli kasablar kethüdâsı es-Seyyid Halil Ağa ve ustalarından mazbûtü’l-esâmî kimesneler hâzır oldukları hâlde ustalığı idâreye kādir idüğü ihbâr olunan Süleyman b. Ahmed muvâcehesinde takrîr-i kelâm edip müvekkilem merkūmun ber-vech-i muharrer mutasarrıf olduğu âlât-ı lâzıme-i ma‘lûmelerini bedel-i misli olan bin yüz guruş bedel-i makbûzu mukābelesinde merkūm Süleyman’a bâ-re’y-i mütevellî bi’l-vekâle ferağ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm gedik tâ‘bir olunan âlât-ı lâzımelerde müvekkilem merkūm Abdullah’ın alâka ve medhali kalmayıp merkūm Süleyman’ın hakk-ı müfevvezi olmuşdur dedikde ol dahi ba‘de’t-tasdîk zikr olunan âlât-ı lâzıme-i ma‘lûmeler mezbûr Süleyman’ın üzerine defter-i vakfa kaydolunup yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-25 min-Zilka‘de sene [1]216