İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 189 Hüküm no: 186 Orijinal metin no: [24b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali bin İsmail’in, Sultan Abdülhamid Han vakfından kiraladığı kasap dükkânını Mehmed Ârif b. Ahmed’e devrettiği Kassab ferağı Ma‘rûz Hüdâvendigâr-ı sâbık cennet-mekân firdevs-âşiyân merhûm ve mağfûrun leh Sultan Abdülhamid Hân hazretleri evkāfı musakkafâtından Yedikule’de yedinci selhhâneye merbût dükkânlarda Üsküdar’da Karacaahmet nâm mahalde vâki‘ bir bâb kasab dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmeye bâ-temessük-ı mütevellî mutasarrıf olan Ali b. İsmail meclis-i şer‘-i münîrde hâssa kasabbaşısı Mustafa Ağa tarafından vekîli kasablar kethüdâsı es-Seyyid Halil ve ustalarından mazbûtü’l-esâmî kimesneler hâzır oldukları hâlde ustalığı idâreye kādir idüğü ihbâr olunan Mehmed Ârif b. Ahmed muvâcehesinde takrîr-i kelâm edip ber-vech-i muharrer mutasarrıf olduğum âlât-ı lâzıme-i ma‘lûmelerimin nısfını yedimde ibkā ve nısf-ı âharını hüsn-i rızâ ve tayyib-i ihtiyârımla bedel-i ma‘lûm ve makbûz mukābelesinde Mehmed Ârif’e bâ-re’y-i mütevellî ferağ ve tefvîz eylediğimde ol dahi ber-vech-i muharrer tefevvüz ve kabûl edip ba‘de’l-yevm gedik tâ‘bir olunan âlât-ı lâzımelerin nısfında benim alâka ve medhalim kalmayıp merkūm Mehmed Ârif’in hakk-ı müfevvezi olmuşdur dedikde ol dahi ba‘de’t-tasdîk zikr olunan âlât-ı lâzıme-i ma‘lûmelerin nısfını merkūm Mehmed Ârif üzerine defter-i vakfa kaydolunup yedine temessük i‘tâsını istid‘â eylediği İstanbul Mahkemesi’nden huzûr-ı âlîlerine i‘lâm olundu. Fî-25 min-Zilka‘de sene [1]216