İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 190 Hüküm no: 187 Orijinal metin no: [25a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moralı Karalanba v. Rayo’nun, Yorgi v. Acı Kasta’da alacağı olduğu Mazbatadan derkenâr Ma‘rûz İmparator orta elçisi ve Herbert Rayilklin işbu memhûr arzuhâlde mastûr Moralı Karalanba v. Rayo zimmî meclis-i şer‘-i münîrde arzuhâlde mastûr Nemçe himâyesinde olan Yorgi v. Acı Kosta zimmî muvâcehesinde işbu târih-i i‘lâm senesi Şa‘banında İzmir’de mukīm Avarna Bedmaki zimmîye beş bin guruş ikrâz ve teslîm ol dahi iktirâz ve kabz eylediğinden sonra meblağ-ı mezkûru İslâmbol’da mesfûr Yorgi zimmîden almak üzere yedime bir kıt‘a poliçe temessükü i‘tâ etmekle ben dahi temessük-ı mezkûru mesfûr Yorgi zimmîye irâe eylediğimde ol dahi okuyup kabûl ve meblağ-ı mezkûr borcumdur deyip lâkin edâ etmemekle hâlâ taleb ederim deyü tasaddî eylediği da‘vâsında husûs-ı mezkûra mesfûr Yorgi zimmînin borcumdur demesi damân ve iltizâmı mutazammın elfâz-ı kefâletden midir deyü istiftâ ve ba‘dehû isbâta havâle olunup bir dahi zuhûr etmemeleriyle henüz da‘vâlarına faysal verilmediği mazbût olmağın sâdır olan fermân-ı âlîlerine imtisâlen zabtı İslâmbol Mahkemesi’nden huzûr-ı âlîlerine i‘lâm olundu. Fî-27 min Za sene 1216