İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 283 Hüküm no: 315 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Mücib Efendi b. Hasan’ın, Tayyibe bt. Mehmed’in tütüncü dükkânı gediğine müdahale etmemesi gerektiği Keşif Ma‘rûz Mübârek rikāb-ı kamer-tâb-ı hüsrevânîye arzuhâl takdîm eden mu‘arrefetü’z-zât Tayyibe bt. el-Hâc Mehmed nâm Hatun bi’l-ma‘iyye rü’yete me’mur Haremeyn-i şerîfeyn müfettişi müderrisîn-i kirâm-ı zevi’l-ihtirâmdan Mehmed Atâullah Efendi ile Çarşamba günü arz odasında huzûr-ı hazret-i kāimmakām-ı âli-makāmda ma‘kūd meclis-i şer‘-i münîrde zikri âtî dükkânın bi’l-îcâreteyn mutasarrıfı Mehmed Mücib Efendi b. Hasan mahzarında İstanbul’da Fenerkapısı kurbünde Tahtaminare Mahallesi’nde vâki‘ mukaddemâ sebzeci ve hâlâ terzi dükkânı karşısında kâin ma‘lûmü’l-hudûd bir bâb tütüncü dükkânı derûnunda mevcûde beyne’l-esnâf mu‘teber ve âhar arzuhâl hâmişinde mastûr derkenâr nâtık olduğu üzere bâ-fermân-ı âlî maden kaleminde tütüncü gediği olup ve gedik-i merkūm işbu yedimde olan bir kıt‘a hüccet-i şer‘iyye nâtıka olduğu üzere mülk-i müşterâm iken merkūm Mehmed Mücib Efendi zabtıma mümâna‘at eder suâl olunup men‘ ü def‘ olunmak murâdımdır deyü da‘vâ ettikde mezbûr Mehmed Mücib Efendi cevâbında müdde‘iye-i mezbûrenin yedinde mülkümdür deyü iddi‘â eylediği hâmiş-i arzuhâlde mastûr derkenârda zikr olunan mu‘teber gedik başka dükkân derûnunda ve benim bi’l-îcâreteyn mutasarrıf olduğum başka dükkân olup derûnunda mukayyed ve mu‘teber gedik yokdur deyü ihtilâf ettikde istikşâf-ı hâl için taraf-ı dâ‘îlerinden mürsel kâtib-i sâni Merhabâzâde Mahmud Efendi ve müfettiş-i mûmâ-ileyh tarafından mürsel İsmail Raif Efendi mahâll-i mezbûra varıp cerîdede mazbûtü’l-esâmî Müslimîn huzûrlarında akd eyledikleri meclis-i ma‘kūd-ı mezkûrda hâmiş-i arzuhâlde mastûr derkenâr nâtık üzere maden kaleminde mukayyed olan duhâncı gediği müdde‘iye-i mezbûrenin ta‘yîn eylediği mukaddemâ sebzeci ve hâlâ terzi dükkânı karşısında kâin merkūm Mehmed Mücib Efendi’nin bi’l-îcâreteyn mutasarrıf olduğu dükkân derûnunda olup ve gedik âlâtını müdde‘iye-i mezbûrenin bâ-hüccet-i şer‘iyye yedinde mülkü olduğunu vukūf-ı tammı olan mahalle-i mezbûre İmâmı Hâfız Abdülkādir Efendi b. el-Hâc Mehmed ve Müezzin Molla İsmail b. İbrahim ve es-Seyyid el-Hâc Süleyman Çavuş Ağa b. es-Seyyid Mehmed ve es-Seyyid Mehmed b. İbrahim ve Berber es-Seyyid el-Hâc Mustafa b. Hüseyin ve es-Seyyid Abdullah b. el-Hâc İsmail ve Ali Beşe b. Mehmed ve Mustafa b. Mehmed ve diğer Mustafa b. Mehmed ve Abdülhalim b. İsmail ve İbrahim b. Mehmed ve Kömürcü Mehmed b. el-Hâc Süleyman ve el-Hâc Salih b. İbrahim ve Hüseyin b. Hasan nâm kimesneler alâ-tarîkı’ş-şehâde tarefeyn muvâcehelerinde haber verdiklerini Mevlânâ-yı mezbûrân mahallinde ba‘de’t-tahrîr ümenâ-i şer‘le meclis-i şer‘a gelip mezbûrân muvâcehelerinde alâ-vukū‘ihî inhâ ve takrîr etmeleriyle mûcebiyle mezbûre Tayyibe Hatun kadîmi kerestesini edâ ve teslîm eyledikçe mezbûre Tayyibe Hatun’un gedik âlâtına merkūm Mehmed Mücib Efendi müdâhale ve ta‘arruz etmemek iktizâ eylediği İstanbul Mahkemesi’nden huzûr-ı âlîlerine i‘lâm olundu. Fî-18 M sene 1217