İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 284 Hüküm no: 316 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kemhacı Kalfalarının yeniden kemahcı dükkânı açamayacağı Kemhacı Kalfaları Ma‘rûz Mübârek rikāb-ı kamer-tâb-ı hüsrevânîye arzuhâl takdîm eden Âsitâne-i aliyyede vâki‘ kemhacı esnâfının me’zûn kalfalarından Agob ve Makar ve Artin ve Paskal ve diğer Agob ve Asvadar ve Arakil ve Karabet nâm zimmîler meclis-i şer‘-i enverde esnâf-ı mezbûrenin kethüdâsı Mahmud Ağa ve Serâserci başı Ebûbekir Ağa ve yiğitbaşı el-Hâc Mustafa ve Ömer Ağa ve es-Seyyid Ahmed Efendi ve es-Seyyid Abdi ve es-Seyyid İbrahim ve es-Seyyid Mehmed vesâir mazbûtü’l-esâmî kimesneler muvâcehelerinde biz esnâf-ı mezbûrenin pîr-perver kalfalarından olup destgâh kurup işlemek murâd eylediğimizde kethüdâ ve ihtiyârlarımız bir müstakil destgâh ister iseniz gedik iştirâ edin deyü her birimizden biner guruş gedik bahâ mütâlebe ederler fîmâ ba‘d ikişer yüz guruşa bize gedik bey‘ etsinler yâhud küşâdımıza mümâna‘at etmesinler deyü iştikâ onlar dahi cevâblarında mesfûrûn pîr-perver izin almış kalfa olduklarını ikrâr lâkin mesfûrûn vesâir Müslim ve zimmî kalfalar bâ-pâye-i sadr-ı Anadolu sâbıkā İslâmbol Kādısı Faziletlü Semahatlü Emin-Beyefendi hazretlerinin huzûrunda husûs-ı mezkûru bizden da‘vâ biz dahi efendi-i mûmâ-ileyhin yedimize verdiği işbu bir kıt‘a i‘lâm nâtık olduğu üzere el-yevm mevcûd olan dört yüz otuz iki aded destgâh kâfi ve vâfî olmağla ziyâde ihdâs olunmayıp ve destgâh sâhiblerinden biri fevt oldukda gediği [43b] evlâdına yoksa müstehak olan kalfasına ve âhar kalfaya verilip bu vechile hareket olunmak üzere mukaddemâ beynimizde ta‘ahhüd ve kavl ve ittifâk etmemizle ber-vech-i muharrer amel olunmak bâbında yedimize bir kıt‘a fermân-ı âlîşân i‘tâ olunmuşdu deyü işbu fermân-ı âlîşânı ibrâz ve fîmâ ba‘d ustalarımızdan destgâh sâhiblerinden biri fevt oldukda destgâhı evlâdı olmadığı sûretde kalfalardan eski bulunanlara istemezse derûnunda olan kalfaya verilmek üzere biz ta‘ahhüd onlar dahi râzılar olmuşlar idi deyü mazmûnları takrîr-i meşrûhlarına mutâbık bir kıt‘a i‘lâm ve bir kıt‘a fermân ibrâz ettiklerinde merkūmun kalfalar tasdîk ve ikrâr edip lâkin bizim kudretimiz olmamağla gedikleri râyic olan dokuz yüz guruş bahâlârından yedi yüz guruş noksanıyla iki yüz guruşa bey‘ eylesinler demeleri şer‘-i şerîfe muhâlif ve müceddeden dükkân küşâd ederiz demeleri kānûn ve nizâmlarına mugāyir olmağla iltifât olunmayıp ber-mûceb-i i‘lâm ve fermân hareketleri iktizâ eylediği İslâmbol Mahkemesi’nden huzûr-ı âlîlerine i‘lâm olundu. Fî-19 M sene 1217