İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 285 Hüküm no: 317 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanes v. Rikail’in, Karyana bt. Markar Nasrâniye aleyhine açtığı menzil davasında iddiasını ispat edemediğinden muarazadan men edildiği Menzil iddi‘âsından men‘ Ma‘rûz Arzuhâl eden ütücü tâifesinden Avanes v. Rafael nâm zimmî meclis-i şer‘-i enverde İstanbul’da merhûm Şeyh Sinan Erdebilî Zâviyesi vakf-ı şerîfi mülhakātından merhûm Cihan Bey Vakfı müstagallâtından Balatkapısı dâhilinde el-Hâc İsa Mahallesinde vâki‘ lede’l-ahâlî ve’l-cîrân ma‘lûmü’l-hudûd bir bâb vakıf menzile bi’l-îcâreteyn mutasarrıfe olan şahsı mu‘arrefe Karyana bt. Markar Nasrâniye muvâcehesinde vakf-ı mezbûrun mütevellîsi es-Seyyid Mehmed Nureddin Efendi hâzır olduğu hâlde menzil-i mezkûra babam mesfûr Rafael zimmî mutasarrıf iken hâlik oldukda menzil-i mezkûr bana intikāl ettikden sonra ben ol târihde sagīr olmamla kıbel-i şer‘den vasim olan anam Tuti Nasrâniye menzil-i mezbûru bilâ-mesûğ-ı şer‘î âhara ferağ edip ol vechile tedâvül-i eyâdî menzil-i mezkûra mersûme Karyana Nasrâniye el-yevm bi’l-îcâreteyn mutasarrıfe olup lâkin anam mersûmenin ber-vech-i muharrer ferağı mu‘teber olmadığından mâ‘adâ ben ba‘de’l-bülûğ ferağını mücîz dahi olma[ma]mla menzil-i mezkûrdan bâ-re’y-i mütevellî keff-i yedi murâdımdır deyü da‘vâ ettikde ol dahi cevâbında müdde‘î-i mersûm husûs-ı mezkûru İstanbul kādısı esbak Faziletlü Mehmed Efendi hazretlerinin huzûrunda bin iki yüz on dört senesi Cemâziyelevveli gurresinde bi-aynihî benden da‘vâ ben dahi anan mesfûre menzil-i mezkûru bâ-mesûğ-ı şer‘î ve bâ-ma‘rifet-i mütevellî bi’l-vesâye Serupa zimmîye ba‘de’l-ferağ onun dahi ferağından kezâlik bâ-re’y-i mütevellî kendi ba‘de’t-tefevvüz babam mersûm Markar zimmîye menzil-i mezkûru iki bin yüz on dokuz buçuk guruş bedel mukābelesinde bâ-re’y-i mütevellî ferağ-ı kat‘î-i mu‘teber ile ferağ ve tefvîz ve menzil-i mezkûra müte‘allika da‘vâdan babam mesfûrun zimmetini ibrâ edip ol vechile tasarrufunda iken hâlik oldukda menzil-i mezkûr benimle er karındaşım Agob ve kız karındaşım Aranohi Nasrâniye’ye ba‘de’l-intikāl onlar dahi hisselerini bâ-re’y-i mütevellî bana tefvîz etmişlerdir deyü bir kıt‘a temessük ve bir kıt‘a izin hücceti ibrâzıyla ve mütevellî-i hâzır-ı mezbûrun tasdîkiyle eylediğim da‘vâmı mersûm zimmî ikrâr ve mûcebiyle mu‘ârazâdan men‘ olunup yedime işbu bir kıt‘a i‘lâm i‘tâ olunmuşdu deyü takrîrine mutâbık efendi-i mûmâ-ileyhin mührüyle memhûr bir kıt‘a i‘lâm ibrâz eylediği da‘vâsını ve mazmûn-ı i‘lâm-ı mezkûru merkūm Avanes zimmî muvâcehesinde Muhyiddin Mahallesi İmâmı Mehmed Efendi b. Halil ve Şeyh Ahmed Nâsır Efendi b. Mehmed ve Abdüşşekur Efendi b. Abdurrahim ve Müezzin Ahmed Efendi b. Abdurrahman ve İsmail Efendi nâm beş nefer şâhidîn-i mu‘âddilîn şehâdetleriyle isbât etmeğin mûcebiyle müdde‘î-i mersûm Avanes zimmî da‘vâ-yı mezkûresiyle mersûme Karyana Nasrâniye’ye kemâkân bî-vech mu‘ârazadan men‘ olunduğu İslâmbol Mahkemesi’nden huzûr-ı âlîlerine i‘lâm olundu. Fî-19 M sene 1217