İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 286 Hüküm no: 318 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Haçador v. Kogas’ın, İsmail, Kadri ve Espas ile bedel-i sulh karşılığında anlaştıkları 1250 guruş te’cîl Ma‘rûz Arzuhâl eden Terzi Haçador v. Kogas nâm zimmî kendi nefsinden asîl ve anası Serpuhi bt. Ohannes nâm Nasrâniye tarafından husûs-ı âtîde vekîl olduğu şahsı ârifân Süleyman Çavuş Ağa b. İbrahim ve Harbeci Mehmed Tahir b. Hasan şehâdetleriyle sâbit olmağla vekâleten meclis-i şer‘-i enverde ekmekçi tâifesinden İsmail b. Hamza ve şerîkleri Kadri ve Süleyman nâm kimesneler ile Espas nâm zimmî muvâcehelerinde işbu yedimde olan bir kıt‘a deyn temessükü nâtık olduğu üzere mezbûrûn-ı gāibûn ani’l-meclis Şarlo ve Pano zimmîlerden her biri âharın zimmetine lâzım gelen mikdâra kefâletle yedimden iktirâz ve kabz eyledikleri sekiz yüz guruşdan bâkī üç yüz guruş zimmetlerinde alacağım olmağla meblağ-ı mezbûru bi’l-asâle ve babam hâlik Kogas zimmînin hayatında dahi kezâlik her biri âharın zimmetine lâzım gelen mikdâra kefâletle iktirâz ve kabz eyledikleri bin iki yüz guruş alacağını babam mersûm kable’l-ahz verâseti benim ile zevcesi anam müvekkile-i mezbûre Serpohi Nasrâniye ve kebîre kızı kız karındaşım Zülal Nasrâniye’ye münhasıra olduğu hâlde hâlik ve meblağ-ı mezbûr bize mevrûs oldukdan sonra mersûme Zülal Nasrâniye dahi meblağ-ı mezbûr bin iki yüz guruşdan hissesini tarafından taleb ve da‘vâ ve ahz u kabz ve sulh-i ibrâya beni tevkîl ben dahi kabûl etmemle mezbûr bin iki yüz guruşu dahi bi’l-asâle ve bi’l-verâse ve bi’l-vekâle mersûmûn İsmail ve Kadri ve Süleyman ve Espas zimmîden asâlet ve kefâletlerine binâen hâlâ taleb ederim deyü da‘vâ eylediğimde onlar dahi cevâbında bir kıt‘a temessük mûcebince asâleten ve kefâleten sekiz yüz guruşdan bâkī üç yüz guruşu bana ve âhar bir kıt‘a temessük mûcebince babam hâlik-i mersûm Kogas zimmîye kezâlik asâleten ve kefâleten bin iki yüz guruş deynleri olduklarını ve babam hâlik-i mesfûr kable’l-ahz verâseti bize münhasıra olduğu hâlde hâlik olduğunu ikrâr lâkin baban mesfûrun helâkinden sonra [44a] bir def‘a beş yüz guruşu edâ ve bir def‘a emrinizle Mehmed Ağa’ya beş yüz guruş teslîm ve beher sene ikişer yüz guruşdan meblağ-ı mezbûrun bilâ-devr ribhi olmak üzere sana üç senede altı yüz guruş teslîm etmişdik deyü def‘a tasaddî ol vechile beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer bi’l-asâle tasaddî eylediğim üç yüz guruş müdde‘âmdan iki yüz elli guruş üzerine bi’l-verâse ve bi’l-vekâle tasaddî eylediğim bin iki yüz guruş müdde‘âmdan bin guruşa merkūmun İsmail ve Kadri b. Süleyman ve Espas zimmî ile ba‘de akdi’l-musâlahati ve’l-kabûl bedel-i sulh-i merkūmdan mâ‘adâ ziyâde müdde‘âma ve bi’l-cümle husûs-ı mezkûra müte‘allika âmme-i da‘vâdan tarefeynden her birimiz âharın zimmetini ibrâ-yı âm ile bi’l-asâle ve bi’l-vekâle ve bi’l-verâse ibrâ ve iskāt ve tarefeynden her birimiz âharın ibrâsını asâleten ve vekâleten ba‘de’l-kabûl ibrâdan müstesnâ bedel-i sulh-i merkūm cem‘an bin iki yüz elli guruşun iki yüz guruşunu târih-i i‘lâmdan yirmi gün murûrunda ve beş yüz yirmi beş guruşunu üç ay mürûrunda ve bâkī beş yüz yirmi beş guruşunu târih-i i‘lâmdan altı ay tamamında tamamen edâ etmek üzere istimhâl eylediklerinde ben dahi ber-vech-i muharrer bi’l-asâle ve bi’l-verâse ve bi’l-vekâle imhâl ve tehîr edip eğer ba‘de zamânin müvekkilem mezbûre Zülal beni ber-vech-i muharrer tevkîlini inkâr ve vekâlet-i mezkûre sâbit olmadığı sûretde meblağ-ı mezbûrdan hissesini tekrar merkūmundan da‘vâ ve şer‘an bir nesne ahz eder ise mikdâr-ı me’hûzuna ben kefîl ve zâmin oldum deyü ikrârını merkūmûn İsmail ve Kadri ve Espas zimmîden her biri tasdîk ve ber-vech-i muharrer kefâleti kabûl ve meblağ-ı mezbûr bin iki yüz elli guruş bedel-i sulhden deynleri olduğunu ikrâr u i‘tirâf ve ber-vech-i meşrûh edâya ta‘ahhüd eyledikleri İstanbul Mahkemesi’nden huzûr-ı âlîlerine i‘lâm olundu. Fî-15 M sene [1]217