İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 288 Hüküm no: 319 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Mehmed’in, tütüncü gediği davasında Mehmed Emin Efendi’nin zimmetini ibrâ ettiği Tütüncü gediği ibrâsı Ma‘rûz Sâhib-i arzuhâl es-Seyyid Hüseyin b. Mehmed nâm kimesne meclis-i şer‘-i münîrde derûn-ı arzuhâlde mezkûrü’l-ism Mehmed Emin Efendi b. Abdullah nâm kimesne muvâcehesinde merkūm Mehmed Emin Efendi’nin bi’l-îcâreteyn mutasarrıf olduğu mahmiye-i İstanbul’da Hasanpaşa Hânı kurbünde fırın karşısında sebzeci ittisâlinde vâki‘ bir bâb dükkân derûnunda mevcûde beyne’l-esnâf mu‘teber ve hâmiş-i arzuhâlde mastûr derkenâr nâtık olduğu üzere maden kaleminde mukayyed duhâncı gediği âlât-ı lâzıme-i ma‘lûmesi hasran vârisi olduğum li-ebeveyn karındaşım Hasan’ın hayatında ile’l-vefât yedinde mülkü olup ve ba‘de vefâtihi âlât-ı lâzıme-i mezkûre bana mevrûs olmuş iken zabtıma merkūm Mehmed Emin Efendi mümâna‘at etmekle suâl olunup men‘ olunmak murâdımdır deyü da‘vâ eylediğimde ol dahi cevâbında hâmiş-i arzuhâlde mezkûr iddi‘â eylediğin benim bi’l-îcâreteyn mutasarrıf olduğum dükkân derûnunda değildir deyü inkâr edip ol vechile beynimizde ba‘de vukū‘ı’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâ-yı mezkûrumdan merkūm Mehmed Emin Efendi ile an inkâr altmış guruş bedel-i medfû‘ ve makbûza ba‘de akdi’l-musâlahati ve’l-kabûl zikr olunan gedik âlâtına vesâir hukūk-ı şer‘iyyeye müte‘allika âmme-i da‘vâdan merkūm Mehmed Emin Efendi’nin zimmetini kabûlünü hâvi ibrâ-yı âmm-ı sahîh-i şer‘î ile ibrâ ve iskāt eyledim dediğini merkūm Mehmed Emin Efendi tasdîk ve tahkīk eylediği İstanbul Mahkemesi’nden huzûr-ı âlîlerine i‘lâm olundu. Fî-19 M sene [1]217