İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 288 Hüküm no: 320 Orijinal metin no: [44a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bahçıvân tâifesinin saray mutfağına verrecekleri ıspanak miktarı Bahçıvân tâifesinin matbah-ı âmireye verdikleri ıspanak i‘lâmı Ma‘rûz Âsitâne-i aliyyede vâki‘ Gemibahçe tâ‘bir olunur bahçebân tâifesinin yiğitbaşısı Anton ve Topkapı kolu yiğitbaşısı Celo ve menzilhâne kolu yiğitbaşısı Nikola ve bahçıvânlardan Ziko ve Kosoko ve Sava vesâirleri meclis-i şer‘-i münîrde Balat kolu tâ‘bir olunur bahçebânların yiğitbaşıları Yorgaki ve Marko ve Estifo ve Filo ve Keskes ve Filib vesâirleri muvâcehelerinde esnâf-ı mezkûrenin kethüdâları İsmail Ağa tarafından vekîli oğlu Ahmed ve ıspanakçılar ocağının bölük başısı İbrahim b. Ali hâzır oldukları hâlde takrîr-i kelâm edip matbah-ı âmireye maktû‘an külle yevm bizler yüz yirmi vakıyye ıspanak teslîm edip lâkin mersûmûn bizlere imdâd ve iânet etmeyip ol vechile bizler gadr olmağla suâl olunup beher yevm verdiğimiz yüz yirmi vakıyye ıspanağın kırk vakıyyesini bizlere imdâd etmek üzere mesfûrûna tenbîh olunmak murâdımızdır deyü istid‘â eylediklerinde mersûmûn dahi cevâblarında ber-vech-i muharrer külle yevm yüz yirmi vakıyye ıspanak verdiklerini tasdîk lâkin kadîmü’l-eyyâmdan beri külle yevm yüz yirmi vakıyye ıspanağı mersûmûn veregelip Balatkapısı bahçebânları vermemişdir dediklerinde beynleri ıslâha havâle olundukda ba‘de’l-yevm Balat kolu bahçıvânları ıspanak baha olmak üzere beher sene müdde‘ûn-ı mesfûrûna ancak elli guruş verip ziyâde kendilerinden ıspanak bahâ mütâlebe olunmamak üzere ta‘ahhüd eylediklerinde mersûmûn dahi bu vechile râzılar olduklarından sonra bahçebân tâifesinin cümlesi yine meclis-i şer‘-i münîrde merkūm İbrahim muvâcehesinde her biri takrîr-i kelâm edip külle yevm maktû‘an cânib-i mîrî veregeldiğimiz sebzevâtı merkūm İbrahim Ağa bizlerden ahz eylediğinden mâ‘adâ âhara bey‘ için iskelelere ve sebzevâtçı tâifesine irsâl eylediğimiz sebzevâtı bi-gayr-ı hakkın tutup dilediği mahallere bey‘ ve teslîm ve semenini kabz edip ol vechile dâimâ bizlere zulm ve te‘addîden hâli değildir deyü cümlesi merkūm İbrahim’den iştikâ ettiklerinde fîmâ ba‘d matbah-ı âmireye maktû‘an veregeldikleri sebzevâttan mâ‘adâ bahçebân tâifesinin iskelelere ve sebzevâtçılara irsâl eyledikleri sebzevâtı bi-gayr-ı hakkın tutmayıp ve hilâf-ı şer‘ rencîde etmemek üzere merkūm İbrahim’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-13 M sene [1]217