İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 289 Hüküm no: 321 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tokel v. Nikagos’un, Samatya’daki uncu değirmenini Manol, Mihal ve Artin’e sattığı Uncu mübâya‘ası Ma‘rûz Âsitâne-i aliyyede Samatyakapısı hâricinde vâki‘ kethüdâ değirmeni demekle arîf beş horoslu bir bâb uncu değirmeni ve değirmen-i mezbûra merbût Yenikapı hâricinde kâin fırançalacı fırını derûnunda beyne’l-esnâf gedik tâ‘bir olunur yirmi re’s bârgir vesâir âlât-ı lâzımelerden yedi bârgir hisseye mâlik Tokel v. Nikagos ve altı buçuk re’s bârgir hisseye mâlik karındaşı Serkiz ve üç buçuk re’s bârgir hisseye mâlik Agob v. Kirhor ve üç bârgir hisseye mâlik Mıgırdıç v. Hazer nâm zimmîler meclis-i şer‘-i münîrde bâ‘isü’l-i‘lâm Manol v. Angeli zimmî ile kendiden asîl ve kürekçi Mihal v. Yanaki zimmî tarafından tasdîka vekîli olan Artin v. Marat nâm zimmîler muvâcehesinde her biri takrîr-i kelâm edip ber-vech-i muharrer mâlik olduğumuz cem‘an yirmi re’s bârgir vesâir âlât-ı lâzımelerimizi tarefeynden îcâb ve kabûlü hâvi bey‘-i kat‘î ve bi-safkatin vâhidetin altmış sehm i‘tibâriyle [44b] on altı sehmini mersûm Manol zimmîye iki bin dokuz yüz altmış guruşa ve on iki sehmini müvekkil-i mersûm Mihal zimmîye iki bin iki yüz yirmi guruşa ve otuz iki sehmini mersûm Artin zimmîye beş bin dokuz yüz yirmi guruşa cümlemiz bey‘ ve temlîk ve vech-i lâyıkı üzere teslîm eylediğimde onlar dahi ber-vech-i muharrer iştirâ ve temellük ve tesellüm ve kabz ve kabûl eylediklerinden sonra semenleri olan cem‘an on bir bin yüz guruşun altı bin beş yüz guruşunu cânib-i mîrîye ol mikdâr deynimiz için beher şehr elli birer guruşdan tamamen cânib-i mîrîye edâya ve beş yüz guruşunu dahi Habîbe Kadın’a ol mikdâr deynimiz için def‘aten edâya ve bâkī dört bin yüz guruşunu dahi ma‘lûmü’l-esâmî tüccâra olan deynimiz için kethüdâmız işbu hâzır bi’l-meclis el-Hâc Abdi Ağa ma‘rifetiyle beher şehr kırkar guruşdan tamamen edâya mersûmûn Manol ve Artin ve müvekkil-i mersûm Mihal zimmîye emr eylediğimizde onlar dahi ber-vech-i muharrer edâya ta‘ahhüd etmeleriyle mebî‘-i mezkûrun tağrîr ve gabnine müte‘allika âmme-i da‘vâdan tarefeynden her birimiz âharın zimmetini kabûlü hâvi ibrâ-yı âm ile ibrâ ve iskāt edip fîmâ ba‘d zikr olunan yirmi re’s bârgir vesâir âlât-ı lâzıme-i ma‘lûmelerde benim aslan ve kat‘an alâka ve medhalimiz kalmayıp mesfûrûnun ber-minvâl-i muharrer mülk-i müşterâları olmuşdur dediklerinde mukırrûn-ı mesfûrûnun bi’l-cümle takrîrlerini asîl ve vekîl-i merkūmân Manol ve Artin zimmîler bi’l-asâle ve bi’l-vekâle ba‘de’t-tasdîk zikr olunan yirmi re’s bârgir ve sâir âlât-ı lâzıme-i ma‘lûmeler i‘tibâr-ı mezkûr üzere altmış sehmin on altı sehmi mersûm Manol ve on iki sehmi müvekkil-i mersûm Mihal ve otuz iki sehmi mersûm Artin zimmînin mülk-i müşterâları olmak üzere Başmuhâsebe’ye kaydolunup yedlerine sûret i‘tâ buyrulması için emr-i âlîleri sudûru niyâzında oldukları İslâmbol Mahkemesi’nden huzûr-ı âlîlerine i‘lâm olundu. Fî-4 min-M sene 1217