İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 290 Hüküm no: 322 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tütüncü Eznavar v. Malkon’un, tütüncü dükkânını Hafize ve Zeyneb Hatun’a teslim etmesi gerektiği Tütüncü gediği Ma‘rûz Mahrûse-i Galata’ya muzâfe kasaba-i Beşiktaş’da Sinan Paşa türbesi ittisâlinde kâin ma‘lûmü’l-hudûd bir bâb mülk dükkânın nısf hisse-i şâyi‘asına mâlik olan sâhib-i arzuhâl Salih Efendi b. Feyzullah kendi nefsinden asâleten ve rub‘una mâlike kız karındaşı Hafize Hatun tarafından husûs-ı âtîde vekîl olduğu zâtını ârifân Ahmed b. Osman ve Mustafa Çavuş b. Yahya şehâdetleriyle sâbit olmağla vekâleten ve rub‘-ı âharına mâlike Şerîfe Zeyneb bt. Hasan nâm hatunun zevci ve tarafından husûs-ı âtîde vekîl olduğu kezâlik zâtını ârifân şâhidân-ı mezbûrân şehâdetleriyle sâbit olan Veliyüddin vekâleten Çarşamba günü arz odasında huzûr-ı hazret-i kāimmakām-ı âli-makāmda ma‘kūd meclis-i şer‘-i enverde İstanbul’da İbrahim Paşa Hamamı kurbünde Mimar Ayas Mahallesinde sâkine Şerîfe Nimetullah bt. el-Hâc Hasan tarafından husûs-ı âtîde vekîl olduğum İbrahim Ağa b. el-Hâc Osman ve İzzet Efendi b. Mehmed şehâdetleriyle sâbit olan İbrahim Efendi b. Ahmed nâm kimesne ile Tütüncü Aznavar v. Malkon nâm zimmî muvâcehesinde ber-vech-i muharrer mâlik olduğumuz dükkân-ı mezkûrda mersûm Aznavar zimmî müşâhereten müstecirimiz olup târih-i i‘lâm-ı şehrî gāyetinde fesh-i akd-i îcâr etmemizle dükkân-ı mezkûru ba‘de’t-tahliyye bize teslîme mersûm Aznavar zimmîye ve dükkân ve dükkân-ı mezbûrda attâr gediğim vardır deyü dükkân-ı mezbûru mülkiyet üzere zabtımıza müvekkile-i mezbûre Nimetullah Hatun bi-gayr-ı hakkın müdâhale etmekle müdâhale etmemek üzere müvekkil-i merkūma tenbîh olunmak murâdımdır deyü bi’l-asâle ve bi’l-vekâle da‘vâ ettiklerinde mesfûr Aznavar zimmî dükkân-ı mezkûr ber-vech-i muharrer mülkleri olup vech-i meşrûh üzere müşâhereten müsteciri olduğunu ikrâr ve vekîl-i merkūm İbrahim Efendi dahi tasdîk ettikden sonra vekîl-i merkūm İbrahim Efendi dükkân-ı mezkûrun derûnunda attâr kethüdâsı defterinde mastûr attâr gediği olup ve gedik-i mezkûra müvekkile-i merkūme Nimetullah Hatun’un irsen ve şirâen yedinde mülkü olmağla hatta ber-vech-i muharrer attâr gediği olduğunu müvekkile-i mezbûrenin yedinde olan iki kıt‘a i‘lâm nâtık olduğu üzere attâr esnâfı ihbâr eylediklerine binâen dükkân-ı mezkûru müvekkilem merkūme Nimetullah Hatun zabt murâd eder deyü da‘vâ eylediği gedik bâ-fermân-ı âlî ma‘dûd ve mu‘teber gediklerden olmadığı hâmiş-i arzuhâlde mastûr derkenâr nâtık ve vekîl-i mersûm Aznavar zimmî tasdîk edip lâkin mücerred esnâf-ı mezkûr defterinde mastûr olduğuna binâen dükkân-ı mezkûru müvekkilem merkūm zabt etmek üzere cebr olunsun deyü vekîl-i mezbûrun îrâd eylediği kelâmına ber-mûceb-i fetvâ-yı şerîfe iltifât olunmamağla mûcebiyle dükkân-ı mezkûru ba‘de’t-tahliyye asîl-i merkūm Salih Efendi ve müvekkiletân-ı mezbûretân Hafize ve Zeyneb Hatun’a teslîme mersûm Aznavar zimmîye ve fîmâ ba‘d dükkân-ı mezbûra bi-gayr-ı vech müdâhale etmemek üzere müvekkile-i merkūmeye izâfetle vekîl-i merkūma tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-7 min-M sene 1217