İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 291 Hüküm no: 323 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihalaki v. Yanaki ve Mihal v. Yani’nin, pişirdikleri francalayı sadece kendi mahallerinde satabileceklerinin tenbihi Fırançalacılara müte‘allik Ma‘rûz Sâdır olan fermân-ı âlîlerine imtisâlen İslâmbol’da Vâlidehânı kurbünde kâin vakf-ı Hümâyûn musakkafâtından olup derûnunda bâ-hatt-ı hümâyûn vakıyyelik fırançala tabh ve i‘mâl olunan bir bâb fırançalacı fırınının gedik âlâtına mutasarrıflarından Mihalaki v. Yanaki ve diğer Mihal v. Yani ve Simkeşhâne kurbünde kâin Habîbe Hanım’ın mutasarrıfe olduğu kezâlik bâ-hatt-ı hümâyûn derûnunda vakıyyelik fırançala tabh ve i‘mâl olunan bir bâb fırında fırançalacı olan Yani v. Mihal ve âhar Mihal v. Yani nâm zimmîler bi’l-ma‘iyye rü’yete memûr Haremeyni’ş-şerîfeyn müfettişi müderrisîn-i kirâm-ı zevi’l-ihtirâmdan Mehmed Atâullah Efendi tarafından mürsel Şeyhzâde Mehmed Sâdık Efendi ve hâlâ Kapan-ı dakīk nâibimiz müderrisîn-i kirâm-ı zevi’l-ihtirâmdan Abdüllatif Efendi hâzır olduğu hâlde ekmekçiler kethüdâsı Abdi Ağa ve nizâm ustalarından Mehmed Ağa ve el-Hâc Hasan Ağa ve Mustafa Ağa nâm kimesneler ile Usta Kigork ve Usta Artin ve Usta Kirhor ve Usta Manol ve Usta diğer Kirhor nâm zimmîler kezâlik hâzır oldukları hâlde İslâmbol ve Bilâd-ı selâsede vâki‘ fırancılacı tâifesinden Bahçekapılı Nikola ve Yenikapılı diğer Nikola ve Tekfursaraylı Mihal ve Sarıgezli Mihal ve Taşlıburunlu Anton ve Kasımpaşalı Yorgaki ve Beyoğlu’nda Astamad ve Mirgune’de Yorgi ve Ayazmalı [45a] Mihal ve Mirahorlu Yani ve Arnabud karyeli Mihal nâm zimmîler muvâcehelerinde işbu yedimizde olan bâlâsı hatt-ı hümâyûn ile mu‘anven iki kıt‘a fermân-ı âlîşân nâtık olduğu üzere vakıyyelik francala tabh ve i‘mâl ancak zikr olunan iki fırına bâ-hatt-ı hümâyûn mahsûs ve nân-ı azîzin veznen sülüsânı olan francala tabh ve i‘mâli kadîmü’l-eyyâmdan beri mesfûrûn francalacılara mahsûs olup vakıyyelik francala mesfûrûn haklarında memnû‘ iken bu esnâda bize mahsûs olan vakıyyelik francalayı bilâ-izn-i sultânî tabh ve i‘mâl etmeleriyle suâl olunup bâ-hatt-ı hümâyûn bize mahsûs olan vakıyyelik francalayı ba‘de’l-yevm mesfûrûn francalacılar tabh etmeyip kadîmü’l-eyyâmdan beri i‘mâl eyledikleri nân-ı azîzin veznen sülüsânı olan francalayı tabh ve i‘mâl etmek üzere İstanbul’da tabh olunan francala İstanbul’da ve Galata’da tabh olunan francala Galata’da ve medîne-i Eyüb’de tabh olunan francala Eyüb’de ve medîne-i üsküdar’da tabh olunan francala medîne-i mezbûrede bey‘ olunup âhar kazâya gitmemek üzere fermân-ı âlî sâdır olmuş iken hilâf-ı emr-i âlî hareket etmeleriyle ber-mûceb-i emr-i âlî her bir kazâ ve kurâlarda tabh ve i‘mâl olunan francala bulunduğu kazânın fırını ve kazâlarında bey‘ olunmak üzere mesfûrûn francalacılara tenbîh olunmak murâdımızdır deyü takrîr-i meşrûhlarına mutâbık üç kıt‘a fermân-ı âlîşân ibrâz ettiklerinde mûmâ-ileyh Abdüllatif Efendi ve hâzirûn-ı merkūmun dahi müdde‘ûn-ı mesfûrûnu takrîr-i meşrûhlarında tasdîk ettiklerinde mesfûrûn francalacılar istintak olundukda cevâblarında zikr olunan vakıyyelik francala mârru’z--zikr iki fırında bâ-hatt-ı hümâyûn tabh ve i‘mâl olunduğu ve üç kıt‘a fermân-ı âlîlerin mazmûnlarını ve kendilerin ber-vech-i meşrûh kadîmü’l-eyyâmdan beri tabh edegeldikleri nân-ı azîzin veznen sülüsânı olan francaladan mâ‘adâ bilâ-izn-i âlî vakıyyelik francala tabh ve i‘mâl eylediklerini ikrâr lâkin fîmâ ba‘d vakıyyelik francala ve vakıyyelik hamîrîden dörtlük francala tabh ve i‘mâl etmeyip kadîmü’l-eyyâmdan beri tabh ve i‘mâl edegeldikleri nân-ı azîzin veznen sülüsânı olan francalayı tabh ve i‘mâl ve bâlâda zikr olunduğu üzere tabh ve i‘mâl eyledikleri francalayı kazâ ve kurâlarında bey‘ eyleyip âhar kazâya getirmemek üzere mesfûrûn francalacılardan her biri ta‘ahhüd etmeleriyle husûs-ı mezkûr ta‘ahhüdleri üzere düstûrü’l-amel tutulup hilâfına hareket olunmamak bâbında tuğra-yı garrâ ile mu‘anven yedlerine bir kıt‘a fermân-ı âlîşân sudûrunu müdde‘ûn-ı mersûmûn Mihalaki ve diğer Mihal ve Yani ve âhar Mihal zimmîlerden her biri istirhâm eyledikleri İslâmbol Mahkemesi’nden huzûr-ı âlîlerine i‘lâm olundu. Fî-23 M sene 1217