İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 293 Hüküm no: 324 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafize bt. Mustafa ile boşandığı kocası Memiş b. Mehmed’in birbirlerinin zimmetlerini ibrâ ettikleri Muhâla‘a ve nafaka-i hamlden ibrâ Ma‘rûz Sâhib-i arzuhâl mu‘arrefetü’z-zât Hafize bt. Mustafa nâm Hatun meclis-i şer‘-i enverde derûn-ı arzuhâlde mezkûrü’l-ism zevc-i sâbıkı Memiş b. Nehmed mahzarında mezbûr Mehmed zevc-i dâhilim olup târih-i i‘lâmdan iki gün mukaddem beni tatlîk etmekle zimmetinde mütekarrir ve ma‘kūdun aleyh olan yüz yirmi guruş mehr-i müeccelim ile mezbûrun firâşından hâsıl sekiz aylık hamlim olmağla vaz‘-ı haml ile iddetim inkızâsına değin beni infâk etmek üzere mezbûr Memiş’e tenbîh olunmak murâdımdır deyü da‘vâ eylediğimde ol dahi cevâbında ancak yüz guruş mehr-i müeccel tesmiyesiyle zevce-i medhûlün-bihâsı olduğumu ve tatlîkini ikrâr u i‘tirâf ve mu‘terif olduğu yüz guruş mehrimi vaz‘-ı haml ile iddetim inkızâsına dek nafakam için on guruş bana teslîme merkūm Memiş ta‘ahhüd eylediğinde ben dahi mâ‘adâ mihrim olan yirmi guruş ve kendiden iddi‘â eylediğim bir sahan ve bir yorgan ve bir tencere ve iki çevre ve üç uçkur ve bir fılardan meccânen fâriğa olmamla sâlifü’l-beyân yüz guruşdan mâ‘adâ hukūk-ı zevciyete ve ibtidâ-yı zevciyetden işbu târih-i i‘lâma gelince sâire müte‘allika âmme-i da‘vâdan tarefeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt ve her birimiz ber-minvâl-i muharrer âharın ibrâsını kabûl eyledik deyü mukırra-i mezbûrenin ikrârını merkūm Memiş tasdîk edip bu vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-27 M sene [1]217