İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 294 Hüküm no: 325 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avakim v. Kiryako’nun, bakkal Anaştaş v. Dimitri’nin bakkal gediği hissesini kendisine teslim etmesi gerektiği 10 sehm bakkāl gediği nizâ‘ı Ma‘rûz Bâ‘isü’l-i‘lâm Bakkāl Anaştaş v. Dimitri zimmî meclis-i şer‘-i enverde zikri âtî gedik âlâtına vaz‘-ı yedi mütehakkık olan Avakim v. Kiryako zimmî muvâcehesinde İstanbul’da Balıkpazarı hâricinde vâki‘ Rali dükkânı demekle ma‘rûf ma‘lûmü’l-hudûd bir bâb havyarcı dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûmenin yüz yirmi sehm i‘tibâriyle mersûm Avakim mâlik olduğu kırk sehm hisse-i şâyi‘anın on sehmini bin iki yüz on altı senesi Zilhiccesinin yirmi üçüncü günü altı yüz guruş semen-i medfû‘ ve makbûza bana bâten ve kat‘iyyen bâ-hüccet-i şer‘iyye bey‘ ve vech-i lâyıkı üzere teslîm ben dahi iştirâ ve kabz edip ol vechile on sehm âlât-ı mezkûre târih-i mezbûreden beri mülk-i müşterâm iken mersûm Avakim zimmî on sehm âlât-ı mezkûreyi fuzûlî zabt etmekle suâl olunup on sehm âlât-ı mezkûreden keff-i yedine tenbîh olunmak murâdımdır deyü da‘vâ ettikde ol dahi cevâbında zikr olunan on sehm âlâta vaz‘-ı yedini ikrâr lâkin ben âlât-ı mezkûreyi târih-i mezbûrda mersûm Anaştaş zimmîye altı yüz guruş semen tesmiyesiyle beni ölünce görüp gözetmek şartıyla bey‘ eylediğimde ol dahi ber-vech-i muharrer ba‘de’l-iştirâ semen-i mezkûrun iki yüz guruşunu kabz edip hatta vech-i meşrûh üzere şart ile bey‘ eylediğimi bin iki yüz on üç senesi Zilka‘desinin beşinci günü Ahi Çelebi mahkemesinde mersûm Anaştaş zimmîden da‘vâ ol dahi ikrâr edip mûcebince şartla olan bey‘in adem-i sıhhatine binâen meblağ-ı mezbûru yedimden ahz-birle on sehm âlât-ı mezkûru bana teslîme mersûm Anaştaş zimmîye tenbîh oldukdan sonra sene-i sâbıkā Şevvâlinin [45b] dokuzuncu günü hâlâ İstanbul Bâb Mahkemesi nâibi müderrisîn-i kirâmdan Mehmed Râşid Efendi’nin huzûrunda mersûm Anaştaş zimmî meblağ-ı mezbûr iki yüz guruşu yedimden ahz ve âlât-ı muharrere-i mezkûreyi bana teslîm edip husûs-ı mezkûre müte‘allika da‘vâdan tarefeynden her birimiz âharın zimmetini ibrâ ve iskāt etmişdik deyü mazmûnları takrîr-i meşrûhuna mutâbık iki kıt‘a i‘lâm ibrazıyla eylediği def‘ini mersûm Anaştaş inkâr eylediğinden mâ‘adâ mersûm Avakim zimmî ber-vech-i muharrer eylediği def‘inden kâzib ve mübtil olduğunu ve âlât-ı mezkûreyi târih-i mezbûrda meblağ-ı mezbûr altı yüz guruş semen-i medfû‘ ve makbûza bey‘-i kat‘î ile bey‘ eylediğini ikrâr u i‘tirâf dahi etmekle mârru’z--zikr on sehm âlât-ı muharrereyi müdde‘î-i mersûm Anaştaş zimmîye teslîme mersûm Avakim zimmîye tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-27 M sene [1]217