İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 295 Hüküm no: 326 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Abdullah’ın Oturakçı esnaflığından çıkarıldığı Oturakçı esnâfından ihrâc Ma‘rûz İstanbul’da Bâtpazarında oturakçı esnâfının kethüdâları olan Ebûbekir Ağa ve yiğitbaşıları Feyzullah ve esnâf-ı mezkûreden el-Hâc Hüseyin ve es-Seyyid Mustafa ve Mehmed Ağa ve Mustafa Ağa ve Abdurrahman ve es-Seyyid Ali ve Uzun Ali ve es-Seyyid el-Hâc Hüseyin ve el-Hâc Mustafa ve Usta Halil vesâirleri meclis-i şer‘-i enverde esnâf-ı mezkûreden Ahmed b. Abdullah muvâcehesinde merkūm Ahmed zikr olunan batpazarında vâki‘ bir bâb dükkânda oturakçı olup lâkin kendi halinde ırzıyla mukayyed ve kâr u kesbiyle meşgūl olmayıp hadîdü’l-lisân ve bed-zebân olmağla kendiye nush u pend olundukda kabûl etmeyip esnâfımızın ihtiyârlarına itâle ve hilâf-ı şer‘ hareket edip ol vechile kendiden emn ve rahatımız meslûbdur deyü merkūm Ahmed’in sû-i hâlini muvâcehesinde ihbâr ve esnâf-ı mezbûreden ihrâcını istid‘â eyledikleri İstanbul Mahkemesi’nden huzûr-ı âlîlerine i‘lâm olundu. Fî-25 M sene [1]217