İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 296 Hüküm no: 328 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esteyas v. Mekil’in, Ohanes v. Artin’den aldığı eşyayı teslim etmesi gerektiği Eşyâ teslîmine tenbîh Ma‘rûz Sâhib-i arzuhâl Ohannes v. Artin zimmî meclis-i şer‘-i enverde Nemçe müste’menlerinden Esteyas v. Mekil muvâcehesinde tercümânı vekîli İvaz hâzır olduğu hâlde târih-i i‘lâmdan üç ay mukaddem Esteyas malından beher çekisi on ikişer buçuk guruşa olmak üzere altı yüz çeki afyon bana bey‘ murâd ettikde ben dahi malından on bin zirâ‘ abâ ve üç aded gömlek ve yedi aded Ahmediye ve bir top çatari ve üç top çiçekli ve üç aded Mağrib şalı ve altı aded Moskov kuşağı ve bir basma kuşak ve bir basma yastık ve altmış zirâ‘ keremsûd ve bir çift Bursakârî yastık ve bir basma fistan ve bir çift piştov ve on iki deste kurşun kalem [46a] ve on iki aded enfiye kutusu ve bir köhne yorgan ve bir çift sagīr piştov ve on vakıyye usfûr ve bir bıçak ve bir top çatari ve iki vakıyye ipek ve on altı aded zarf ve yirmi dört dirhem şerit ve sekiz dirhem mak‘ad saçağı ve iki yüz dirhem yelek harcı ve bir çift çizme ve sekiz aded silcek ve beş yüz altmış dört değirmi Yenikapıkârî yemenî ve yedi vakıyye fırının saçağı müste’men-i mersûma bey‘ etmek üzere mukāvele ve mu‘âhede ve herkangımız işbu mukāveleden rücû‘ ederse âhara bin guruş deyni olmak üzere bir kıt‘a temessük tahrîr ettikden sonra henüz müste’men-i mersûm zikr olunan afyonu vezn ve bana teslîm ve bey‘-i mezbûr beynimizde mün‘akid olmaksızın ben bâlâda mezkûr eşyânın abâdan mâ‘adâsını bilâ tesmiyeti’s-semen sûret-i bey‘de müste’men-i mersûma teslîm ol dahi kabz etmişdi lâkin el-yevm beynimizde bey‘-i mezbûr mün‘akid olmayıp eşyâ-i muharrere-i mezkûre müste’men-i mersûmun yedinde mevcûd olmağla eşyâ-i muharrere-i mezkûreyi bi-aynihî bana teslîme müste’men-i mersûm Esteyas’a tenbîh olunmak murâdımdır deyü da‘vâ ettikde ol dahi cevâbında kaziyye minvâl-i muharrer üzere olduğunu ve eşyâ-i muharrere-i mezkûre bi-aynihî mevcûde olduğunu kat‘iyyen ikrâr u i‘tirâf edip mücerred vech-i meşrûh üzere muâhede eylediğimize binâen zikr olunan ol mikdâr abâyı dahi bana teslîm edip ba‘dehû ol mikdâr afyonu ba‘de’l-vezn kendiye teslîm ederim demesi takrîr-i meşrûhu üzere henüz beynlerinde bey‘ mün‘akid olmadığını mu‘terif olup ve mün‘akid olduğu sûretde dahi bâtıl olmağla meşrû‘a olmadığı kendiye tefhîm olundukda vech-i meşrûh üzere kabzını mu‘terif olduğu eşyâ-i muharrere-i mezkûreyi müdde‘î-i mezbûre bâ-istimhâl işbu târih-i i‘lâmdan bir ay mürûrunda bi-aynihî mersûme Avanes zimmîye teslîme ta‘ahhüd ettikde mersûm Avanes zimmî dahi râzı olup ol vechile kat‘-ı nizâ‘ eyledikleri İstanbul Mahkemesi’nden huzûr-ı âlîlerine i‘lâm olundu. Fî-2 S sene [1]217