İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 297 Hüküm no: 329 Orijinal metin no: [46a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Galata Fındıklı’daki değirmen dükkânı ve fırının Said Ağa, Sovilon, Agob, Bedros, Ohan ve Mikail’in mülkleri olduğu Değirmen mübâya‘ası Ma‘rûz Canbaz tâifesinden Sovilon beled-i Haranos nâm zimmî kendi nefsinden asâleten ve Said Ağa nâm kimesne ile Habbâz Agob ve Habbâz Bedros ve Habbâz Ohan ve Habbâz Mikayil nâm zimmîler taraflarından husûs-ı âti’l-beyânda vekîl olduğu usta Artin ve Usta Kirkor nâm zimmîler ihbârlarıyla zâhir olmağla vekâleten meclis-i şer‘-i enverde ekmekçiler kethüdâsı el-Hâc Abdi Ağa ve uncular kethüdâsı Mustafa Ağa ve nizâm ustalarından Mehmed Ağa ve Hasan Ağa ve Usta Kigork ve Usta Artin ve Usta Kirhor ve Usta Manol ve Usta Şirin vesâir mazbûtü’l-esâmî ustalar hâzır oldukları hâlde bi’l-asâle ve bi’l-vekâle ikrâr-ı kelâm edip işbu yedimde olan müte‘addid hücec-i şer‘iyye nâtıka oldukları üzere Galata muzâfâtından Fındıklı’da Biruze Hatun Mahallesinde vâki‘ Mehmed Ağa fırını demekle ma‘rûf bir bâb ekmekçi fırını ve Büyükdere’de vâki‘ bir bâb ekmekçi ve bir bâb francalacı fırınları ve fırın-ı mezbûrlara merbût Mehmed Ağa’nın fırını ittisâlinde kâin dokuz horoslu bir bâb değirmen derûnlarında mevcûde beyne’l-esnâf gedik tâ‘bir olunur otuz altı re’s bârgir vesâir âlât-ı lâzıme-i ma‘lûmelerin otuz altı sehm i‘tibâriyle altı hissesi benim ve iki hissesi mezbûr Said Ağa’nın on iki hissesi mezbûr Agob ve sekiz hissesi mersûm Bedros ve dört hissesi mersûm Ohan ve dört hissesi mersûm Mikail zimmîlerin yedimizde mülk ve hakkımız olmağla âlât-ı muharrere-i mezkûreler i‘tibâr-ı mezkûr üzere Başmuhâsebe’ye kaydolunup yedimize başka başka sûret verilmek murâdımızdır deyü bi’l-asâle ve bi’l-vekâle eylediği istid‘âsı vâkı‘a mutâbık ve nefsü’l-emre muvâfık olduğunu hâzirûn-ı mezbûrûndan her biri ihbâr etmeleriyle bâlâda mezkûre âlât-ı lâzıme-i ma‘lûmeler i‘tibâr-ı mezkûr üzere iki hissesi merkūm Said Ağa ve altı hissesi mersûm Sovilon ve on iki hissesi mesfûr Agob ve sekiz hissesi mersûm Bedros ve dört hissesi mersûm Ohan ve dört hissesi mersûm Mikail zimmîlerin mülkleri olmak üzere muhâsebe kalemine kayd ve yedlerine başka başka sûret i‘tâ buyrulmasını istid‘â eyledikleri İslâmbol Mahkemesi’nden huzûr-ı âlîlerine i‘lâm olundu. Fî-25 min-M sene 1217