İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 298 Hüküm no: 330 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Abdullah’ın, Hüseyin b. Hasan ve ortağı Mehmed b. Ahmed’e olan borcunu ödemesi gerektiği 400 guruş hüküm Ma‘rûz Derûn-ı arzuhâlde isimleri mezkûr kasab ustalarından Hüseyin b. Hasan ve şerîki Mehmed b. el-Hâc Ahmed meclis-i şer‘-i münîrde Balatkapısı dâhilinde bir bâb kasab dükkânında kannâdârları olan sâhib-i arzuhâl Mustafa Ağa b. Abdullah muvâcehesinde mezbûr kasab Mustafa Ağa kannâdârımız olup bin iki yüz on altı Rebî‘ülâhirinin gurresinden sene-i mezbûre Zilka‘deti’ş-şerifesinin yirmi beşinci gününe gelince bi’d-defa‘ât vezn ve kendiye bey‘ ve teslîm eylediğimiz ma‘lûmü’l-kıyye lahm-ı ganemin hesâbını hesâb-ı sahîh ile şuhûd mahzarında yegān yegān rü’yet eylediğimizde teslîmâtı fürû-nihâde olundukdan sonra lede’l-muhâsebe zimmetinde dört yüz guruş alacağımız zuhûr ettikde merkūm Kassab Mustafa hesâb-ı mezkûr sehv ve galatdan âri sahîh ve lede’l-muhâsebe cihet-i mezkûreden meblağ-ı mezbûr zimmetinde deyni olduğunu ikrâr-ı kat‘î ile ikrâr ve târih-i mezbûr ile muvarrah yedimize bir kıt‘a deyn temessükü dahi vermekle meblağ-ı mezbûr dört yüz guruşu mezbûr kasab Mustafa’dan hâlâ taleb ederiz deyü takrîrlerine mutâbık bir kıt‘a temessük ibrâzıyla da‘vâ ettiklerinde ol dahi cevâbında müdde‘iyân-ı mezbûrânın kannâdârları olup ol mikdâr müddetde lahm-ı ganem bey‘ u şirâsı beynlerinde cereyân eylediği ve târih-i mezbûrda ancak hesâb gördüklerini ikrâr ve ber-vech-i muharrer lede’l-muhâsebe zimmetimde ol mikdâr guruş deyni zuhûr eyledi deyü ikrâr-ı kat‘î ile ikrâr edip temessük-ı mezkûru inkâr <>-birle hesâb-ı mezkûrda galat vâki‘ olmağla tekrar rü’yet-i muhâsebe murâdımdır deyü ber-vech-i muharrer ikrâr-ı kat‘î ile ikrâr edip temessük-ı mezkûru verdiğini inkâr etmekle müdde‘iyân-ı mezbûrân ber-vech-i muharrer müdde‘âlarını lede’t-tezkiye adl ve makbûlü’ş-şehâde idükleri ihbâr olunan Hasekioğlu Mehmed Emin ve Kahveci Mustafa nâm kimesneler şehâdetleriyle bi’l-muvâcehe ber-nehc-i şer‘î isbât etmeğin mûcebiyle [46b] meblağ-ı mezbûr dört yüz guruşu müdde‘iyân-ı mezbûrâna edâ ve teslîme merkūm kasab Mustafa’ya tenbîh olunduğu İslâmbol Mahkemesi’nden huzûr-ı âlîlerine i‘lâm olundu. Fî-5 min-S sene 1217