İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 299 Hüküm no: 331 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Berber Bedros v. Roza’nın, berber gediği davasında Avanis v. Kiragos’un zimmetini ibrâ ettiği Berber gediği nizâ‘ı mu‘ârazadan men‘ Ma‘rûz Arzuhâl eden Berber Bedros v. Roza nâm zimmî meclis-i şer‘-i enverde Avanes v. Kiragos muvâcehesinde dergâh-ı âlî kapıcı başılarından Yeğen İbrahim Ağa tarafından husûs-ı âti’l-beyânı tasdîka vekîl-i şer‘îsi olan Çukadâr Feyzullah b. Halil hâzır olduğu hâlde İstanbul’da sedefciler sûkunda kâin müvekkil-i mûmâ-ileyhin bi’l-îcâreteyn mutasarrıf olduğu bir bâb berber dükkânı derûnunda mevcûde beyne’l-esnâf gedik tâ‘bir olunur âlât-ı lâzıme-i ma‘lûme mersûm Avanes zimmînin yedinde mülkü olmağla âlât-ı lâzıme-i ma‘lûmenin nısfını mersûm Avanes zimmî mu‘teber gedik olmak üzere sekiz yüz guruş semen-i medfû‘ ve makbûza bi-safkatin vâhidetin bana bey‘ ben dahi ba‘de’l-iştirâ dükkân-ı mezbûrun mutasarrıfı mûmâ-ileyh dükkân-ı mezkûrun derûnunda mu‘teber gedik yokdur deyü beni ihrâc sadedinde olduğunda ben dahi gedik-i merkūm mu‘teber değildir deyü nısf-ı âlât-ı mezkûreyi yedinden ahz-birle semen olmak üzere medfû‘um olan sekiz yüz guruşu mersûm Avanes zimmîden istirdâd ederim deyü da‘vâ sadedinde olmuşdum el-hâletü hâzihi müvekkil-i mûmâ-ileyh âlât-ı muharrere-i mezkûre mu‘teber gedik olduğunu tasdîk ve yedime bir kıt‘a dahi gedik tezkiresi vermekle ben dahi mersûm Avanes zimmîden ber-vech-i muharrer tasaddî eylediğim da‘vâmdan fâriğ olup husûs-ı mezkûra müte‘allika da‘vâdan dahi mersûm Avanes zimmînin zimmetini rızâmla kabûlünü hâvi ibrâ ve iskāt edip bu vechile kat‘-ı nizâ‘ eyledik deyü ikrâr u i‘tirâfını mersûm Avanes ve hâzır-ı merkūm Çukadâr Feyzullah’dan her biri tasdîk eyledikleri tescîl olunduğu İstanbul Mahkemesi’nden huzûr-ı âlîlerine i‘lâm olundu. Fî-3 S sene [1]217