İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 300 Hüküm no: 332 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mihal v.i Yorgi’nin, Hammâmî Salih Ağa b. Ömer ve Ayşe bt. Mustafa’nın zimmetlerini ibrâ ettiği Keşf-i menzil Ma‘rûz Sâdır olan fermân-ı âlîlerine imtisâlen kıbel-i şer‘-i münîrden mürsel kâtib-i sâni Merhabâzâde Mahmud Efendi hâssa mi‘mârı hulefâsından Halil ve Ali Necib Halîfeler ile İstanbul’da Kırkdört kapısı kurbünde Balaban Ağa Mahallesinde vâki‘ münâza‘un fîh olan mahalle varıp huzûr-ı Müslimînde ba‘de akdi’l-meclis arzuhâl eden dülger kalfalarından Mihal v. Yorgi nâm zimmî meclis-i ma‘kūd-ı mezkûrda zikri âtî menzile mutasarrıfe olan mu‘arrefetü’z-zât Âişe bt. Mustafa nâm Hatun hâzıra olduğu hâlde Hammâmî Salih Ağa b. Ömer tarafından husûs-ı âti’l-beyânı tasdîka vekîl-i şer‘îsi es-Seyyid Halil Ağa b. es-Seyyid Mehmed mahzarında müvekkil-i mezbûr Salih Ağa târih-i i‘lâmdan iki buçuk sene mukaddem hâzıra-i mezbûrenin mahâll-i mezbûrede vâki‘ ma‘lûmü’l-hudûd menzilinin enkâz-ı mevcûdesinden mâ‘adâ malından kereste ile müceddeden menzile binâ ile her masrafın olur ise malımdan eda ederim deyü müvekkil-i mezbûr Salih Ağa bana emr etmekle ben dahi mukāvelemiz vechi üzere müceddeden menzil binâ ve malımdan ebniye-i mezkûreye ecnâs kereste ve mismâr ve kireç ve kiremit ve ücret-i neccârân vesâir levâzımına masrûfum olan altı yüz guruşun bi’d-defa‘ât üç yüz guruşunu bana edâ ve teslîm bâkī üç yüz guruşu dahi müvekkil-i mezbûrdan bi’l-mürâca‘a taleb ederim deyü da‘vâ eylediğimde ol dahi cevâbında müvekkil-i mezbûrun ber-vech-i muharrer emrini ikrâr lâkin ol mikdâr masrûfumu tasdîk etmemekle ol vechile beynimizde ba‘de’l-münâza‘a bâ-tavassut-ı muslihîn ben ber-vech-i muharrer tasaddî eylediğim da‘vâmdan vekîl-i mezbûr ile altmış guruş bedel-i makbûza ba‘de’s-sulh ve’l-kabûl ziyâde müdde‘âma bi’l-cümle husûs-ı mezkûra müte‘allika âmme-i da‘vâdan müvekkil-i mezbûr Salih Ağa ile hâzıra-i mezbûre Âişe Hatun’un ve sadri kebîr oğlu Abdurrahman Beşe b. İsmail’in ve vekîl-i mezbûrun zimmetlerini ibrâ-yı âm ile ibrâ ve iskāt eylediğimde onlar dahi bi’l-asâle ve bi’l-vekâle ibrâ-yı mezkûru kabûl eylediler dedikde mezbûrûn dahi mukırr-ı mesfûr Mihal zimmîyi cemî‘-i kelimât-ı meşrûhasında tasdîk ve tahkīk edip bu vechile kat‘-ı nizâ‘ eylediklerini Mevlânâ-yı mezbûr mahallinde ketb ve tahrîr ve ma‘an mürsel ümenâ-i şer‘le meclis-i şer‘a gelip alâ-vukū‘ihî inhâ ve takrîr eyledikleri İstanbul Mahkemesi’nden huzûr-ı âlîlerine i‘lâm olundu. Fî-23 M sene [1]217