İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 301 Hüküm no: 333 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Ali’nin, alacak davasında Aleksi v. Yamandi ile sulh oldukları 150 guruşa sulh ve ibrâ Ma‘rûz Arzuhâl eden balkapanı tüccârından Mustafa Ağa b. Ali bi’t-terâzi meclis-i şer‘-i enverde bakkāl esnâfından Aleksi v. Yamandi zimmî muvâcehesinde mersûm Aleksi zimmînin balkapanı tüccârlarından Yağcı Mustafa Ağa’ya zimmetinde deyni olan yüz otuz dört guruş ve Yağcı Ömer Ağa’ya iki yüz otuz sekiz guruş ki cem‘an üç yüz yetmiş iki guruş deynine emriyle ben kefîl oldukdan sonra mezbûrân Mustafa Ağa ve Ömer Ağa meblağ-ı mezbûr üç yüz yetmiş iki guruşunu bi-hükmi’l-kefâle benden ahz u kabz etmeleriyle ben dahi meblağ-ı mezkûr üç yüz yetmiş iki guruşu asîl-i mersûm Aleksi zimmîden bi’l-mürâca‘a da‘vâ ol dahi inkâr-birle beynimizde ba‘de vukū‘ı’l-münâza‘a bâ-tavassut-ı muslihîn ben meblağ-ı mezbûr üç yüz yetmiş iki guruş da‘vâmdan mersûm Aleksi zimmî ile an inkâr yüz elli guruş bedel-i makbûza ba‘de akdi’l-musâlahati ve’l-kabûl ziyâde müdde‘âma müte‘allika âmme-i da‘vâdan mersûm Aleksi zimmînin zimmetini ibrâ-yı âmm-ı râfi‘u’l-hısâm ile ibrâ ve iskāt ol dahi ibrâ-yı mezkûrumu kabûl-birle kat‘-ı münâza‘a eyledik dediğini mersûm Aleksi zimmî tasdîk eylediği İstanbul Mahkemesi’nden huzûr-ı âlîlerine [i‘lâm olundu.] Fî-11 min-S sene 1217