İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 302 Hüküm no: 335 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâni Salih Efendi b. Ahmed’in, Mehmed Emin b. Receb’den satın aldığı Şirin isimli Arap cariyenin illetli olması sebebiyle iâdesine karar verildiği Mecnûne Arab câriye geriye red Ma‘rûz Sâhib-i arzuhâl Sâni Salih Efendi b. el-Hâc Ahmed meclis-i şer‘-i enverde esirci tâifesinden derûn-ı arzuhâlde mezkûrü’l-ism Mehmed Emin b. Receb muvâcehesinde sene-i sâbıkā Şa‘bân-ı şerîfi evâhirinde merkūm Mehmed Emin’den cemî‘-i uyûbdan sâlime olmak üzere üç yüz doksan guruş semen-i makbûza iştirâ ve kabz eylediğim işbu hâzıra bi’l-meclis zenciyetü’l-asl Şirin nâm câriye cünûn-ı mutbıka ile mecnûn olduğuna vâkıf olduğum anda câriye-i mezbûreyi işbu hâzır bi’l-meclis el-Hâc İbrahim Ağa’ya emâneten teslîm edip illet-i mezbûre câriye-i mezbûrede şirâ târihinden mukaddem mevcûd ve kadîm ve inde’t-tüccâr noksan-ı semen icâb eder uyûbdan olmağla redd-i mebî‘ ve istirdâd-ı semen murâdımdır deyü teveccüh-i husûmet bulunduktan sonra da‘vâ ettikde merkūm Mehmed Emin-cevâbında ber-minvâl-i meşrûh câriye-i mezkûreyi bey‘ ve semeni olan meblağ-ı mezbûr üç yüz doksan guruşu kabzını ikrâr lâkin câriye-i mezbûrenin cünûnu kadîm olduğunu inkâr etmeğin bu makūle uyûbu bâ-fermân-ı âlî teşhîsine memûr huzzâk-ı etibbâ-i hâssadan Salih Efendi ve İbrahim Efendilere irâe olundukda onlar dahi ba‘de im‘âni’n-nazar meclis-i şer‘a gelip câriye-i mezbûrenin cünûnu kadîm ve şirâ târihinden mukaddem câriye-i mezbûrede mevcûd olduğunu alâ-tarîkı’ş-şehâde bi’l-muvâcehe haber vermeleriyle merkūm Sâni Salih Efendi câriye-i mezbûreyi kabûle delâlet eder kavlen ve fi‘len kendiden nesne sâdır olmadığına bi’l-muvâcehe gıbbe’t-tahlîfü’ş-şer‘î mûcebiyle câriye-i mezbûreyi merkūm Sâni Salih Efendi’den ahz-birle semeni olan meblağ-ı mezbûr üç yüz doksan guruşu müdde‘î-i merkūm Sâni Salih Efendi’ye red ve teslîme merkūm Esirci Mehmed Emin’e tenbîh olunduğu İstanbul Mahkemesi’nden huzûr-ı âlîlerine i‘lâm olundu. Fî-11 S sene [1]217