İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 307 Hüküm no: 341 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Edirnekapı, Sultanhamamı Mahallesi’nde yanmış ekmek fırını binâsının yeniden inşasına izin verilmesi Sultanhamamı’nda muhterik fırın binâsı için i‘lâm Ma‘rûz Sâdır olan fermân-ı âlîşâna imtisâlen İstanbul’da Edirnekapısı kurbünde Sultanhamamı Mahallesi ahâlîsinin bâ-arzuhâl binâ ve inşâsını istid‘â eyledikleri mahalle-i mezbûrede vâki‘ muhterik ekmekçi fırınının binâ ve inşâsı husûsu hâlâ Kapan-ı dakīk nâibimiz efendi dâ‘îlerinden lede’t-tahkīk fırın-ı merkūm binâ olunduğu sûretde civânda olan ibâdullâha her vechile enfa‘ ve şiddet-i şitâda sıbyân ve nisvâna sühûlet ve her vechile hayr-ı mahz ve emr-i müstahsen olduğunu ihbâr etmekle ol vechile ashâb-ı arzuhâlin istid‘âları vâkı‘a mutâbık olduğu zâhir olmağın bu sûretde fırın-ı mezkûrun binâ ve inşâsına irâde-i aliyyeleri buyrulmak husûsu re’y-i rezîn-i isâbet-karînlerine menût idüğü huzûr-ı âlîlerine i‘lâm İstanbul Mahkemesi’nden i‘lâm olundu. Fî-17 S sene [1]217