İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 307 Hüküm no: 343 Orijinal metin no: [48a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkadir b. Mustafa ve Mustafa b. Zeynelâbidin’in, Sinan Paşa Vakfı’ndan icareli hamamı Salih Ağa b. Ahmed’e kiraladıkları Hamam îcârı i‘lâmı Ma‘rûz Ashâb-ı arzuhâlden Haseki el-Hâc Abdülkādir b. Mustafa ve Bostanî Mustafa b. Zeynelâbidin asâleten ve Nefise bt. Abdullah nâm Hatun tarafından husûs-ı âti’l-beyânda vekîl olduğu zâtını ârifân Ali Ağa b. Mustafa ve diğer Ali Ağa b. Hasan şehâdetleriyle sâbit olan Ömer Efendi b. el-Hâc Ahmed vekâleten nezâret-i Şeyhülislâm -sellemehü’s-selâmîde— âsûde evkāf müfettişi mevâlî-i izâmdan Faziletlü Suedâ Beyefendi ile bi’l-ma‘iyye du‘âhânemizde akd olunan meclis-i şer‘-i şerîf-i enverde derûn-ı arzuhâlde mezkûrü’l-ism Hammâmî es-Seyyid Salih b. Ahmed mahzarında nezâret-i müşârun-ileyhde âsûde Sinan Paşa Vakfı musakkafâtından kasaba-i Beşiktaş’ta köprübaşı ittisâlinde kâin çifte hammama biz ve müvekkile-i mezbûre ale’l-iştirâk bi’l-îcâreteyn mutasarrıflar ve derûnunda mevcûd gedik âlât-ı lâzıme-i ma‘lûmesinin dahi nısfı müvekkile-i merkūme Nefise Hatun’un mülkü ve nısf-ı âharı merkūm Salih Ağa’nın mülkü ve hammam-ı mezkûra dahi beher şehr kırkar guruş kirâ ile müşâhereten müstecirimiz olup lâkin kırk guruş hammam-ı mezkûrun îcâre-i misli olmamağla hammam-ı mezbûru merkūm es-Seyyid Salih Ağa îcâre-i misli ile istîcâr eylemesini bi’l-asâle ve bi’l-vekâle murâd eylediğinde ol dahi cevâbında hammam-ı mezbûrun kırk guruş kadîm kirâsı olup ve kadîm kirânın üzerine zam olunmak yedimde olan fermân nâtık olduğu üzere memnû‘dur deyip ol vechile beynimizde ba‘de’l-münâza‘a beynimiz ıslâh ve tevfîk olunup tarefeynden her birimiz rızâsıyla biz hammam-ı mezkûru şehr-i âtî Rebi‘ulevveli gurresinden beher şehr yüz guruşa merkūm es-Seyyid Salih Ağa’ya bi’l-asâle ve bi’l-vekâle îcâr eylediğimizde ol dahi ber-vech-i muharrer istîcâr ve kabûl ve îcâre-i mezkûreyi beher şehr hitâmında edâya ta‘ahhüd edip bu vechile kat‘-ı nizâ‘ eyledik deyü ikrâr ve tasdîkleri tescîl ve İstanbul Mahkemesi’nden huzûr-ı âlîlerine i‘lâm olundu. Fî-19 S sene [1]217