İstanbul Mahkemesi 78 Numaralı Sicil (H. 1216-1217 / M. 1801-1803) cilt: 82, sayfa: 310 Hüküm no: 345 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kefçe Mahallesi mescid-i şerifi imamı Halil Efendi’nin, şart-ı vâkıf gereği Mustafa Ağa sıbyan mektebinde muallimlik yapması için kendisine berat verilmesi İmâm Ciheti Ma‘rûz Sâdır olan fermân-ı âlîşâna imtisâlen işbu arzuhâl derkenârlara nazar olundukda nezâret-i dâ‘îlerinde âsûde evkāfdan medîne-i Üsküdar’da Cebecibaşı esbak merhûm Mustafa Ağa Mektebi’nde mu‘allim-i sıbyânlık yevmî yedi akçe vazîfe ile medîne-i mezbûrede Kefçe Mahallesi mescid-i şerîfinde imâm olanlara meşrûta olduğu ve câmi‘-i mezkûrda imâmet ciheti sâhib-i arzuhâl imâm Halil Efendi’nin el-yevm üzerinde olduğu ve vazîfe-i merkūmesi dâhil-i muhâsebe olageldiği derkenârlardan müstebân ve mu‘allim-i sıbyân olanların müstakillen berâtı olmayıp muallim-i sıbyân cihetine müstakillen yedine berât i‘tâ buyrulmasını işbu sâhib-i arzuhâl Halil Efendi istid‘â etmekle merkūm Halil Efendi el-yevm mekteb-i mezbûrda edâ-yı hizmet eylediğini mahalle-i mezbûre ahâlîsinden olup sikātdan olan silahşör-i hâssadan Abdurrahman Ağa b. Besim ve Zaim ali Ağa b. Mehmet ve Mustafa Efendi b. Ahmet ve el-Hâc Ali b. es-Seyyid Mehmed ve es-Seyyid İbrahim b. es-Seyyid Mehmed ve el-Hâc Ali b. Abdullah ve Eyüb Ağa b. Mustafa ve Ahmed b. Halil ve Mustafa b. Ömer ve Mehmed b. Ali ve İshak b. Hüseyin nâm kimesnelerden her biri meclis-i şer‘de alâ-tarîkı’ş-şehâde haber vermeleriyle sâhib-i arzuhâl merkūm İmâm Halil Efendi’nin muallim-i sıbyân ciheti için vazîfe-i mersûmesiyle yedine müstakillen ve müceddeden berât-ı âlişân sadaka ve ihsân buyrulmak husûsu re’y-i âlilerine menût idüğü İslâmbol Mahkemesi’nden huzûr-ı âlîlerine i‘lâm olundu. Fî-21 min-S sene 1217